Кейінге қалдыруды уақыт көтермейді

Алматы облысы Шамалған станциясында орын алған апат талайға сабақ болғаны анық. Ал теміржолшылар үшін бұл бұрыннан айтылып келе жатқан, таптаурын мәселе екені де жасырын емес. Осыған орай, қазіргі таңда еліміздегі барлық теміржол өткелдерін тексеру қолға алынып, олардың жұмысын күшейту тапсырылды.

Осыған орай, өткен аптада Шымкент жол бөлімшесінде теміржол саласының мамандары және жергілікті атқарушы билік өкілдері, ІІД органдары, көлік прокуратурасы, көліктерді бақылау инспекциясы қатысқан көшпелі жиын болып өтті.

Кеңеске жиналғандар ҚР Индустрия және инфрақұрылымдық даму вице-министрі Б.Камалиевтің Ақсеңгір-Шамалған өткелінде болған жол апатына байланысты хаттамалық шешімін орындау барысын талқылады. Шымкент магистральдық желі бөлімшесінің директоры Марат Оңалов, Жүк тасымалы бөлімшесінің (НОДГП-9) бас инженері Әбілқасым Айдаров, НЖС-9 бас инженері М.Битеміров кеңеске қатысушыларға бірлескен көшпелі жиынды екі кезеңнен өткізуді ұсынды.

Алдымен бірінші кезеңде Шымкент қаласы бойынша өткелдер мен қатерлі учаскелерге тексеру жүргізілсе, екінші кезеңде облыс бойынша жүргізуді ұйғарды. Жергілікті билік пен құзырлы органдардың өкілінен құралған жұмыс тобы теміржол мамандарымен бірлесіп, өткелдер мен учаскелерді тексеріп шықты. Нәтижесінде Шымкент қаласы бойынша комиссиялық тексеруде Шымкент-ҚызылсайМанкент учаскелерінде жаяу жүргіншілерге арналған жолағы бар автокөліктер өтетін 5 жол мен 10 жаяу жүргіншілер көпірінің құрылысын салу қажеттігін анықтады. Аталған телімдер өте қауіпті деп танылған. Себебі, дәл осы жерлерде адам басу мен пойыздардың шұғыл тежеу оқиғалары жиі тіркелген.

Оның ішінде екі өткелде көлік кептелісі өте көп болғандықтан жаяу жүргіншілер жолағы бар жолды кешіктірмей салуды уақыт талап етіп отыр. Олар: 3294 шақырымдағы Шымкент-Қызылсай өткеліндегі 8 пикетте орналасқан 1 санатты өткел мен Шымкент-Қызылсай өткелінің 9 пикеттегі 3301 шақырымдағы 2 санатты өткелі. Осы аталған екі өткелге (3294 км ПК8, 3301км ПК9) жол құрылысы бітпей жатып, Жедел басқару орталығының бейнекамерасы мен өтуге тыйым салынғаны туралы жол белгілерін, 3301 км ПК 10 өткелін кеңейтуді кейінге қалдыруға болмайтыны және осы аймақтарда өткелдерді қоршау мәселесі де сөз болды. Сондай-ақ, 3294 км 9 пикет пен 3301 км 8 пикеттегі өткелдердің қарбалас кезіндегі ереже бұзушылықтың алдын алу үшін жол полициясының жұмысын күшейтуді жалғастыру керектігі де айтылды.

Сонымен жұмыс тобы бірлесе отырып, төмендегідей шешімдер шығарды. НЖС-9 Шымкент қаласы әкімдігіне Жедел бақылау орталығының мәліметтері бар бейнекамера орнатуын, өткелдерден өтуге тыйым салатын жол белгілерін орнатуды, автожолдарға жол белгілерін салуды, 3301 км ПК 10 өткелін кеңейтуді, өткелдерге жол полициясының уақытша бекеттерін орнату жөнінде акт қабылдады. ПЧ-53 бекітілген тәртіппен 2020-2021 жылғы инвестициялық бюджеттен қоршаулар сатып алуды ұйғарды. Қорыта айтқанда, комиссия тобы бірауыздан шешім қабылдап, Шымкент-Қызылсай-Манкент учаскесіне жаяу жүргіншілер жолағы бар 5 автожол мен 10 жаяу жүргіншілер көпірін салу құрылысына бюджеттен қаржы бөлуді қарастыру жөнінде Шымкент қаласының әкіміне хат жолдады. Себебі, бұл – кейінге қалдыруды уақыт көтермейтін жобалар.