Күйзеліспен күресе білген жөн

Жұмыстың өнімді болуы қызметкердің біліктілігіне, кәсібилігіне ғана емес, оның көңіл- күйіне де байланысты. Әсіресе, жауапкершілігі зор, заң мен мұқияттылықты талап ететін теміржол саласында бұл түсініктің маңызы аса жоғары. Бұл ретте семейлік теміржолшылар тұрмыстық немесе қызметтік өмірде стрестен қалай сақтануға болады, хош көңіл-күйді қалай қалыптастыру керек деген сауалдар төңірегінде мамандар пікіріне құлақ түріп, өзара тәжірибе алмасты.

ҚР Президенті жанындағы мемлекеттік басқару академиясының ШҚО бойынша оқытушысы Гүлфия Берікболова мен ШҚО біріккен кәсіподақ ұйымдарының «Шаңырақ» татуласу орталығының жетекшісі Елизавета Абдрахманова сынды кәсіби мамандар өткізген жиынның беташарын бөлімше басшысы Марлен Көкрекбаев ашып, басқосудың негізгі мәніне тоқталып өтті.

Ал семинарға жиналған кадр бөлімі мамандары мен мекемелер, станциялар басшылары осыдан соң екі топқа бөлініп, пайдалы дәріс тыңдады.

Мәселен, Гүлфия Октябрқызы күйзеліске бой алдырмаудың маңыздылығы жайында сөз қозғап, жағымсыз энергиялардан сақтану, сонымен қатар, тұрмыс пен қызмет барысында конфликтілік жағдайлардың алдын алу жайында ғылыми тұжырымға негізделген дәйектемелермен бөлісті.

Сондай-ақ, ішкі ресурсты сарқып алмау мен жұмыс барысында орын алатын стреске қарсы «қытай қорғанын» тұрғызу, позитивті ұстанымда болу туралы тұшымды кеңес берді. Осы орайда үйдегі ерлізайыптылар қатынасы мен жұмыста әріптестер мен басшылар арасындағы келіспеушіліктерді болдырмау туралы да аса пайдалы ұсыныстармен бөлісті.

Қатысушылар арасында сөз алған Семей жол дистанциясының басшысы Рахат Ботаспаев, Аягөз станциясының басшысы Еркін Тойкенов тақырып аясында пікір білдіріп, өздерінің өмірлік тәжірибелерімен бөлісті. Жиын барысында жастар тарапынан қойылған сауалдар да көп болды. Әр сұраққа тыңғылықты жауап қайырған психолог мамандар қазіргідей жағдайда әр адам үшін өз денсаулығымен қатар көңіл-күйіне де ерекше көңіл бөлу керектігін жеткізді.

– Ғылыми тұрғыдан дәлелденген бір жайт – жүрекқан тамыр ауруларынан бастап қатерлі ісікке дейінгі аурулардың туындауына тұрмыс пен қызмет барысындағы ауыр психологиялық ахуал әсер етеді. Сол себептен де әр жұмысбасты адам үшін жағымды көңіл-күй, позитивті ойлау, жағымсыз энергиялардан сақтану мен пейіл-сана тазалығы аса қажет қасиеттер саналады, – деп атап өткен маман Гүлфия Берікболова ішімдік ішу проблемаларды уақытша ғана ұмыту тәсілі болғандықтан жағдайды шеше алмайды деп те түйіндеп өтті.

Семинарда сонымен қатар, амбициялық ұстанымда болу мен мақсатқа жету жолындағы табандылық жайында да кеңінен сөз болды. Дегенмен, ерлер мен әйелдердің қызмет барысында тең еместігі жайындағы пікірлер қызу пікірталасқа да айналып, қатысушылар өз көзқарастарын ортаға салды. Бір сөзбен айтқанда, күйзеліс кезінде уақытша эмоционалдық жағдайды жеңе білген, онымен күресе білген жөн деген тұжырым жасалды.