«Ойыннан от шығады» деген осы...
Ақтөбе облысы бойынша меншікті тілші
Ақтөбеде жүріп келе жатқан пойыздың алдына шығып селфи жасамақ болған жап-жас қыз опат болды. 19 жастағы зардап шегуші тыйым салынған жермен өткен және теміржолшылардың дабылына, ескертуіне құлақ аспаған.
Оқиға 4 желтоқсан күні Астана уақытымен сағат 22:49-да тіркелді. Қаланың Әуе қалашығы ауданындағы теміржолдың 1789 шақырымы маңында сағатына 38 шақырым жылдамдықпен жүріп келе жатқан тепловоз жолда бөгде адамның тұрғанын байқап, шұғыл тежегіш басқанмен, қағып кеткен қызды құтқарып қалу мүмкін болмады.
Қайғылы жағдайды жол дистанциясының басшысы баяндап берді. «Сол маңда болған куәгерлерден жауап алынды. Теміржол бойына шығып кеткен қыз телефонға алданып, қауіпті ескермеген. Дабылға назар аудармай, арты қайғылы жағдаймен аяқталды. Зардап шегуші тыйым салынған жерден өтіп тұр. Оның үстіне жылдамдықпен келе жатқан жұп пойызды фонға алып, суретке түскен. Сол кезде №1273 тақ пойызының келгенін байқамай қалған болу керек», – деп хабарлайды жол дистанциясының басшысы Кеңес Нұртаев. Зардап шегуші Ақтөбе облыстық жедел жәрдем ауруханасына жеткізілген. 19 жастағы екінші курс студенті бір литр қан жоғалтып, ашық ми жарақатын алған. Бірден жансақтау бөліміне жатқызылып, ота жасалғанымен, қыз баланы құтқарып қалу мүмкін болмады дейді дәрігерлер. Мамандардың айтуынша, тұрғындардың арасында өз өміріне бей-жай қарайтындар көп. Теміржолшылар жол қозғалысы ережесін қатаң сақтауды ескерту жұмыстары тұрақты жүргізіледі. Бірақ, болып жатқан қайғылы жағдайлардан қауіптің ескерілмейтінін көруге болады. «Арнайы өткелден өту керектігін айтып, түсіндірме жұмыстары тұрақты жүргізілгенімен, жүргіншілердің дені белгіленбеген жермен жүруді әдетке айналдырған. Осындай қайғылы жағдайлар тіркеліп жатса да, теміржолдың қауіпті аймақ екенін түсіндіру қиын болып тұр. Жыл басынан бері 19 орында 3900 адамға түсіндіру жұмыстары жүргізілді. Оқу орындары мен мектептерде желілік полиция қызметкерлері әкімдік өкілдерімен бірге 8778 адамға түсіндіру жұмыстарын жасады. Әкімдікке 6 рет хат жазып, 7 рет рейд жұмыстары жүргізілді. Оның үстіне теміржол вокзалына жол бойындағы қауіпті бейнероликпен күн сайын көрсетіп жатырмыз. Қайғылы жағдайлар азаймай тұр», – дейді Кеңес Нұртаев. Қала ішіндегі қауіпті өткелдерге аспалы көпір салу мәселесін жергілікті әкімдікке тұрақты көтеріп, хат жазылғанымен әзірге нәтиже жоқ екен.