Талап күшті

Ақтөбе станциясында жас мамандардың қытымыр қысқа дайындығы тексерілді. Күн тәртібінде әрбір теміржолшы жауапкершілікті сезініп, қатал маусымның кездейсоқ тосынсыйларын қаперде ұстауға тиіс. 

Қауіпсіздікті бірінші орынға қойған станция басшылары жас мамандарға тәжірибелік тұрғыда пысықтау сабақтарын өткізіп, тәртіптің сақталуын басты назарда ұстауды талап етті. Қолданыстағы локомотивтердің көпшілігі ескіргендіктен оларды жөндеп, пайдалану мерзімін ұзартып отырған мамандар жа уапкершілікті екі есе күшейтіп отыр. Себебі иненің жасуындай кемшіліктің өзі үлкен қауіпқатерге әкелуі әбден мүмкін. Техникалық қызметтен, тексерістен өткен тепловоз қайта қабылданар алдында бірнеше маманның қырағы көзінен өтеді. Ақтөбе станциясының басшылары мен биыл жұмысқа қабылданған 20-дан аса жас маман шойын жол бойына шығып, қыс мезгілінде темір жолда жұмыс жасаудың ерекшелігі, қауіпсіздік техникасы мен тосын жағдайда шешім қабылдай алу жолдары түсіндірілді. Ақтөбе-2 станциясы аумағында техникалық сабақтар өтті. Онда қолайсыз ауа-райында жұмыс жасау жолдары үйретіліп, кезекші посттар және вагондардың жылдамдығын реттеу тәсілдері практикалық және техникалық жаттығуларда көрсетілді. – Қыста бағыттамаларды қардан және мұздан тазарту бекет кезекшісінің негізгі міндеттерінің бірі болып табылады. Тәжірибелі кезекші бұл жұмыстардың маңыздылығын жақсы түсінеді. Бағыттамалардың қауіпті аймақта орналасқанын ескере отырып, оны тазартуда белгілі бір ережелерді білу қажет. Мысалы, тазарту жұмыстары пойыздардың қозғалысы мен маневрлік пойыздар арасында немесе жолды жабу кезінде жүргізіледі. Мұны кемінде екі адамнан тұратын топ орындауға тиіс. Олардың біреуі пойыздардың қозғалысын бақылайды. Жұмыс орны күндізгі уақытта қызыл сигналмен қоршалуы керек. Ал түнде және көрінбейтін жерде қызыл түс беретін қол шамы болуы керек. Бұған қоса, жұмысшы станцияның кезекшісіне хабарлауы керек. Міне, осындай негізгі қағидаларды әрбір теміржолшының білуі шарт, – деген Ақтөбе станция бастығының орынбасары Асан Жұмағұлов теміржол босаңсуды көтермейтінін, басшыға да, қосшыға да талап күшті екенін тағы қайталады. Станцияда кәсіби теміржолшыларды даярлайтын тәжірибелік мектеп қалыптасқан. Кезекті тәжірибелік сабақ кезінде вагон жылдамдығын реттеуші маманның жұмыс орны көрсетіліп, «Қауіпті аймақ!» деген ескертпе сөздің тұжырымдамасы талқыға салынды.