«Адал қызмет» - жолаушылар игілігі үшін

Шымкент қаласының теміржол вокзалында 11-13 желтоқсан аралығында «Адал қызмет» халықтық бақылау акциясы болып өтті. Аталған шара 500-ден астам жолаушыны қамтыған.

Айта кетейік, жаңа жобаның мақсаты – жолаушыларға сервистік қызмет көрсетуді жақсарту үшін кері байланыс орнату. Жобаны ұлттық тасымалдаушы «Жолаушылар тасымалы» АҚ жүзеге асыруда. Жалпы, Қазақстан темір жолы бойынша 120-дан астам әртүрлі бағытта жүретін пойыздар бар екен, соның ішінде 65-тен астамы қала маңындағы тасымал. Үш күндік шарада оны ұйымдастырушылар вокзалға келген жолаушыларға кеңес беруден бөлек, билет алу, сервистік қызметтерге қолжетімділікті түсіндіретін пайдалы буклеттер таратылды. Сондай-ақ, жолаушылардың талап-тілегін, ұсынысшағымдарын жазып алды.

«Біз халыққа билет алу жолдарын түсіндіру жұмыстарын жүргіземіз. Билеттерді қай сайттардан және қандай терминалдан қалай алуға болатынын айтамыз, көрсетеміз және үйретеміз. Қазіргі таңда билеттерді «Қазпоштадан» да алуға болады. Сондай-ақ, 15 интернет сайт пен оның ішінде «ҚТЖ» ҰК АҚ-ның bilet.railways.kz сайты да бар. ҚТЖ қарасты кассаларда «Күту парағы» қызметін кассирлерге де тыңғылықты үйретіп жатырмыз. «Күту парағын» білген азаматтар бөтен адамнан, қолдан билет сатып алмайды, яғни алыпсатуға жол жабылады. Билетті осылайша адал жолмен барып алуға болады.

Акцияның бірінші күні 50-ден астам жолаушы халықпен жұмыс істедік. «Күту парағына» оннан астам адамды тіркеп, билет рәсімдеуге көмектестік. Екінші күні де 40 шақты адамға көмек көрсеттік. Желтоқсан айында өзіңіз білесіз, мерекелерге орай билеттерді халық алдын ала алып қойған. Адамдар билетті екі-үш күн қалғанда іздейді. Орын болмаған жағдайда жолаушылар алыпсатарлардың қармағына түсіп қалмас үшін 7 күн алдын жүретін пойыздарға тіркетіп жатырмыз. Билет шыққан жағдайда смс хабарлама келеді. «Адал қызмет» жобасының көздегені де сол, жолаушыларды алыпсатарларға жем болмай, заңды да адал жолмен билет алуға дағдыландыру, үйрету», – дейді «Қаламаңы тасымалы» АҚ Шымкент аймақтық телім бастығы Ғалымжан Бурхан. Бұдан бөлек, жобаны насихаттаушылар жолаушыларға билеттердің қайтарымы қалай жасалады, ережелер мен соңғы өзгерістерді, төсеніштердің жаңадан ауыстырылуына байланысты бағалардың қымбаттағанын да айтып түсіндірді. Себебі, жолаушылар арасында тарифтердің жоғарылауына байланысты түсініспеушіліктер де туындаған. Билет бағасы 25 пайызға дейін өзгермелі болып тұрады. Мысалы, билетті ертерек алса, 25 пайызға төмен, ал күні жақындап орындар толық сатылып жатса, 25 пайыз қымбатқа алады. «Бұл акция еліміздің төрт қаласында болып жатыр. Жолаушылар тасымалының өкілі ретінде кеңес беріп жатырмыз. «Адал қызмет» жобасы жолаушылармен кері байланыс орнатуға бағытталған. Вокзалға келген адамдар біздің миссиямызды білсе дейміз. Осы жылдың 1 шілдесінен бері 50 мыңнан астам адам онлайн түрде билет алыпты. Бұл дегеніміз, онлайн қызметке сұраныстың артып отырғанын білдіреді. Соған қарамастан кейбір адамдар әлі де «Күту парағы» қызметі барын біле бермейді. Әсіресе жасы үлкен адамдар. Жастар интернетте көп отыратындықтан олар билетті онлайн тапсырыспен ала салады. Бұл тегін қызмет түрі әрі өте ыңғайлы. Билет өткізген жолаушы болса немесе қосымша вагон тіркеп жатса, электронды поштасына хабарлама барады», – дейді «Жолаушылар тасымалы» АҚ маркетинг және сату департаментінің бас менеджері Айгүл Абуталипова. Айта кететін жайт, жаңа жыл мерекесіне қарсы 16 желтоқсаннан бастап Алматы-Түркістан, Алматы-Шымкент бағытына қосымша екі пойыз шықты. Ұлттық тасымалдаушының өкілдері жолаушыларға билетті 30, 45 күн бұрын алса, арзанға түсетінін, жолаушы ауырып қалған жағдайда медициналық анықтамасын көрсетсе, билеттің ақшасы үш күн ішінде қайтарылып берілетіні туралы да айта кетті.