Жеңіске әркімнің де бар таласы...
Абай облысы бойынша меншікті тілші
Бүгінде 2 мыңның үстінде теміржолшы тұратын Аягөз станциясында сала қызметкерлерінің спортпен тұрақты айналысып, салауатты өмір салтын ұстанулары үшін барлық жағдай жасалған.
Сала қызметкерлерінің денсаулығын нығайта отырып, бұқаралық спорт түрлерін дамыту – ұлттық компанияның қызметтік саясатының басымды бағыты. Осынау орайда биылғы жылы да аягөздік теміржолшылар түрлі спорттық сайыстарды жиі өткізіп, қалалық, облыстық бәсекелерде топ жарды.
Жыл қорытындысы бойынша Аягөздегі барлық теміржолға қарасты мекемелерден жасақталған 10 команда арасындағы жүлдегерлер анықталды. Соның нәтижесінде аягөздіктер арасында бірінші орында Аягөз локомотив жөндеу депосының теміржолшылары тұр. Команда капитаны Бақытжан Табанов бастаған сұрмерген теміржолшылар тек қаладағы әріптестерін ғана емес, шаһар бойынша өткізілген спартакиадада өзге мекемелер футболшыларын да ойсырата ұтып, жеңіс тұғырына көтерілген болатын.
– Бүгінгі таңда Аягөз қаласында теміржолшы жас буынның қатары көп. Биылғы жарияланған Жастар жылы аясында өскелең буынның қоғамдағы белсенділігін арттыру мақсатында Аягөзде де бірқатар шаралар қолға алынған болатын. Соның ішінде спорттық сайыстарға ерекше көңіл бөлінді. Айта кетерлігі, біздің жігіттеріміз де жарады. Жолдастық кездесулерден бөлек «Харекет» қайырымдылық қоры үшін «1000 теңгеге – баспана» акциясы аясында да футболдан кездесулер өткізіп, теміржолшылар атынан зор үлес қостық, – дейді Аягөз локомотив жөндеу депосының басшысы Асқат Тлеубаев.
Ал түрлі сайыстарда жүлде салып жүрген Аягөз белгі беру және байланыс дистанциясы мен Аягөз станциясының спортшылары кейінгі орындарға жайғасты. Мұндай спорттық шаралар қатары алдағы 2020 жылы да осы қарқынмен жалғаса беретін болады дейді аягөздіктер.