«Адал қызмет» – халықтық бақылау
Ақтөбе облысы бойынша меншікті тілші
Ұлттық тасымалдаушы «Жолаушылар тасымалы» компаниясы бастамасымен «Адал қызмет» халықтық бақылау жобасы вокзалдарда жолаушылармен қабылдау өткізіп жатыр.
Елімізде жолаушыларға сервистік қызмет көрсету сапасын жақсарту мақсатындағы жаңа жоба жұмысын бастады. 11-13 желтоқсан аралығында жолаушыларды қабылдау арқылы кері байланыс жасаған компания филиалдары мен құрылымдарының қызметкерлері вокзалдарда түсіндіру жұмыстарын жүргізуде. Алғашқы төрт топтың жұмысы Нұр-Сұлтан, Алматы-2, Ақтөбе, Шымкент қалаларында басталды. Ақтөбе вокзалында жоба жетекшілерінен кеңес алған халық тек алғыс айтуда.
«Вокзалда үш күндік акция өтіп жатыр. Алғашқы күні 37 жолаушы көмек сұрады. Олардың дені билеттің аздығын айтып, вагон қосуды сұрайды. Тұрғындардың көпшілігінің билет алуға ерте қамданбайтынын көруге болады. Жолға шығуға екі-үш күн қалған кезде ғана билет іздеуді бастайды. Желтоқсан айында мерекелік күндерге байланысты билет іздеп жүргендер қарасы көп. Қазір тұрғындардың арасында онлайн билет алу, электронды қызмет көрсету жақсы дамып келеді. «Күту парағына» хабар жіберу арқылы босаған билеттер туралы мәліметтер алуға болады. «Адал қызмет» жобасы аясында осындай тұрғыда түсіндіру жұмыстары жүргізіліп, халықты ақпараттандыруда. Алғашқы күннің өзінде bilet.railways.kz сайтына 12 адамды тіркеп, үйде отырып онлайн билет алу жолдары көрсетілді. Халық ризашылығын білдіріп жатыр», – дейді «Жолаушылар тасымалы» АҚ «Батыс» аймақтық филиалы директорының орынбасары Бақытжан Шатаев.