Шымкентте өтпелер мәселесі өткір тұр

Шымкент жол дистанциясының қызмет көрсету аумағында 7 күзетпелі, 11 күзетпесіз өтпе бар. Былтырғы жылы ПЧ-53 бойынша өтпеден автокөліктердің өту барысында 13 жол ережесін бұзу оқиғасы орын алған. Оның бәрі тиісті орындарға жолданып, қажетті іс-шара қолданылған.

Дистанция бойынша өткен жылы теміржол өтпелерінде тіркелген бір ғана оқиғаны мысалға алсақ, Түлкібас-Шымкент учаскесіне қарасты ШымкентҚызылсай өтпесінің 2876 пикетінде Арыс ТЧЭ-32-ге қарасты ВЛ80с-2408 электровозының машинисі 3301 шақырымдағы пикетте шұғыл тоқтауға мәжбүр болған.

Өтпе кезекшісі Ахматқұловтың ескертпесі мен жанып тұрған бағдаршамға қарамастан мемлекеттік номердегі көліктің иесі ашық тұрған шлагбаумнан өте шықпақ болған. Салдарынан кезекші Ахматқұлов ЦЗ1627 нұсқаулығына сәйкес, пломбыда тұрған бөгеттік дабылдаманы қосуға мәжбүр болады. Нәтижесінде машинист пойызды шұғыл тежейді. Өрескел орын алған жол бұзу ережесі МАИ қызметіне жолданып, тиісті шара қабылданған.

– Алматы жол бөлімшесінде орын алған Шамалған оқиғасы сияқты қақтығысты болдырмау мақсатында біз түсіндіру жұмыстарын жүргізуді күшейттік, бүкіл автокөлік жүргізушілеріне жадынамалар таратылды. 2020 жылы осы өтпелердегі пойыздардың қауіпсіздігін сақтау мақсатында бөгеттік құрылғылар (УЗП) мен резиналық төсемдерге тапсырыс берілді. 4 өтпеге автоматты шлагбаум орнатуға тапсырма берілді. Олар: Шымкент қаласында орналасқан 3301 шақырымдағы Сайрам өтпесі мен Бакалейторг өтпесі, Бадам станциясындағы 3255 шақырым мен 3265 шақырымда орналасқан күзетпелер. Бұлар 2020 жылғы жобаға кіреді, – дейді ПЧ-53 жетекші инженері Ақтолқын Жоланова.

Сонымен қатар, ескерту хат жолдағанымен кейбір жағдайларда олардың өрескел қылықтарын айғақтайтын дәлел болмағандықтан жазасыз кететін жағдайлар көп екен. – Соңғы бірнеше жылдан бері қала әкімшілігіне, өзіміздің ҚТЖ басшылығына барлық өтпеге бейнебақылау қою керектігін айтумен келеміз. Бейнебақылау орнатылған жағдайда өтпедегі заң бұзу оқиғалары азаяр еді. Себебі, өтпелерде кезекшілерге пышақ, тапанша көрсетіп қорқытып кететін оқиғалар бар. Біздің бөлімде тек Машат пен Ақсудағы көпірде ғана екі бейнекамера бар, – дейді жетекші инженер.

Бұдан бөлек, жетекші инженердің айтуынша, өткен жылы бүкіл күзетпелі өтпелерге комиссиялық түрде тексеру жүргізіліп, әкімшілік, Полиция департаменті, МАИ, көліктік бақылау комиссиясы жол дистанциясына қарасты 94-ші және 3301-ші өтпенің орнына көпір салу керектігін анықтап, астанаға хат жолдаған. Комиссия мүшелері аталған екі өтпеде автокөліктердің ағыны өте көп екендігіне көз жеткізген. Қысқасы, аймақта өтпелер мәселесі өткір тұр.