Ақтөбе станциясында рейд өтті

Ақтөбе станциясында қауіпсіздік шарасын күшейтуге байланысты рейд өтті. Жолаушылардың белгіленбеген жерден өтуіне қатысты өткен шара станциялықтар мен желілік полицияның бірлесуімен биылғы жылға бекітілген жоспарға сай ұйымдастырылды.

«Әр адам жеке басының қауіпсіздігіне мұқият қараса, жазатайым оқиғалардың алдын алуға болады. Бірақ, пендешілік танытып, «асығып тұрмын» деген сылтаумен жіберілген бүгінгі қателік ертең әдетке айналады. Ал, «ауру қалса да, әдет қалмайды» дегенді ескерсек, бұл өте қауіпті болмақ. Ол әдетті өзімізге ғана сіңіріп қоймай, балаларымызға үйретеміз.

Бізден көргенін істеп, олар да жолды айналып өтуге ерініп кесіп өтуді әдетке айналдырады. Бір күн болмаса бір күн қырағылығыңды жоғалтып, пойыздың астына түсіп қалу қаупі өте зор. Жұмысыңды тәмамдап, үйіңе беттеген тұстан бастап, құрметті теміржолшы, сен де бөгде адамның қатарына жататыныңды ұмытпа. Жұмыс барысында қырағылық танытып, сақ болып үйренген сіздің де қызметтен тыс уақытта зейініңіз қауіпті аймақтан аман-сау өтуіңізге кепіл бола алмауы мүмкін. Сол себепті де, теміржол аумағын тек қана белгіленген жерлермен өтуге шақырамыз», – дейді Ақтөбе станция басшысының орынбасары Асан Жұмағұлов көпшілікке қарата.

Теміржолдың тыйым салынған аумағынан өтпекші болған бөгде жандарға сақтық шаралары тағы да ескертілді. Теміржолшылардың сараптауынша, жол-көлік оқиғаларының тең жартысы пойыздың жақындап қалғанын ескермей, жолдан өтуге асығатындар арасында тіркеледі.

Жолдан кесіп өтуді әдетке айналдырған адам-дармен жеке дара сөйлесіп, түсіндіру жұмыстарын жүргізген рейдке шыққандар сақтық шаралары үшін бұрын болған жазатайым оқиғалардан мысал келтіріп, оларды жаман әдеттен арылып, теміржолды тек белгіленген жерден кесіп өтуді қағидаға айналдыруға шақырды.