Адам өмірі ойыншық емес

Өткен жылы Атырау жүк тасымалы бөлімшесінде өндірістік жарақат алу жағдайы тіркелмеген. Ол, әрине, жақсы көрсеткіш. Оған қауіпсіздік пен еңбек қорғауды қамтамасыз ету мақсатында басшылар тарапынан қолға алынған кенеттен тексеру жүргізу, станцияларда жұмысшылардың технологиялық процесті, қауіпсіздік техникасының ережелерін сақтауын қадағалау сынды шаралар себеп болғаны анық.

Өткен жылы барлығы 504 кенеттен тексеру жүргізілсе, оның тең жартысына жуығы түнгі уақытта болған. Бөлімшенің бас инженері Б.Картан бұл жерде тексеру арқылы кемшілік табу мақсаты тұрмағанын, ең алдымен, қауіпсіздіктің алдын алу, ескерту, жұмысшының жауапкершілігін арттыру міндеті тұрғанын айтады. Десек те, тексеру барысында 92 кемшілік анықталған.

Олар негізінен қауіпсіздік техникасын, жұмыс технологиясын, лауазымдық міндеттерді сақтамау, арнаулы киім мен белгі беру құралдарын қолданбау, еңбек тәртібін бұзу, білім-білік төмендігі, медициналық тексерістен уақытылы өтпеу сынды кемшіліктер.

«Бірақ кемшілік жаза берумен шектелмеуі тиіс. Мәселен, аталған кемшіліктерді әр жұмысшы бұзбауына болады. Қауіпсіздікті сақтап, арнаулы киімін киіп жүрсе, білімін жетілдіріп, өз ісіне жауапкершілікпен қараса, оған кім қой депті?! Бұл жерде әр адамның санасына, жеке тәртібіне байланысты мәселе туындайды» дейді бас инженер.

Қауіпсіздікті сақтауда практикалық сабақтардың тиімділігі жоғары болатыны сөзсіз. Бұл бағытта қауіптілігі аса жоғары аймақта жасайтын жұмысшыларға қауіпсіз жұмыс жасау іс-тәжірибесін көрсету бойынша 697 сабақ өтіпті. Қауіпсіздік диалогы бойынша да 377 қауіпті жағдай мысалы келтірілген.

Кестеге сәйкес, Атыраудан бастап Шоқпартоғай, Бек-Бике, Бәйтерек, Д.Нұрпейісова, Исатай, Афанасьево, Махамбет, Ганюшкино, Жамансор, Мұқыр, Атырау, Ақжайык, Құлсары, Аққыстау, Мақат, Сағыз, Теңдік, Қарабатан, Тұманды, Ескене, Доссор, тағы бірқатар станция мен шағын бекеттерде техникалық ревизия жүргізіліп, 317 жұмысшының білім деңгейі тексерілген.

Теміржолшылардың үнемі дала өтінде жүретіні белгілі. Сол бағытта еңбек гигиенасы, суықта қалай жүру, ыстықта өзін қалай ұстау, қатты жел кезінде қалай әрекет ету мысалдары да қажетті дүниелер. Ол бойынша да бюллетендер таратылған, сабақтар өткен. Теміржолшылар – үйдегісінен түздегісі көп кәсіп иелері. Оларда арнайы тамақтану уақыты болғанымен, пойыз келіп тұрғанда оған мүмкіндік бола бермейді. Сол себепті жұмыс орындарында кез келген уақытта ыстық тамағы мен шайын ішіп шығуға жағдай жасалуы керек. Ганюшкино, Атырау, Ақжайык, Теңдік, Қарабатан, Сағыз, Құлсары станцияларында теміржолшылардың ас ішу бөлмелері барлық қажетпен жабдықталған.

Жалпы бөлімше бойынша қауіпсіздіктің алдын алуға барлық жағдай жасалып отыр. Станцияларда «Қауіпсіздік диалогы», «Өндірістік қауіпсіздіктің он екі негізгі ережесі», «Хенрих травматизмінің пирамидасы» тақырыптарында көрнекі жадынамалар ілінген. Сол секілді медициналық мекемемен «Инфаркт пен инсульттің алдын алу» жадынамасы әзірленіп, «Бірінші медициналық көмек көрсету» бойынша жедел жәрдем мамандарымен тренинг өткізілген. Жалпы қауіпсіздік бойынша өткен жылы 9 шара жоспарланып, оған бөлінген 72088,3 мың теңге толықтай игеріліпті. Ал жазғы-қысқы арнаулы киіммен және арнайы қорғаныс құралдарымен бөлімше жұмысшылары 100 пайыз қамтамасыз етілген.

– Биыл бөлімше бойынша өндірісте алғашқы қысын өткізіп жатқан 63 адамның барлығы да оқытылып, тәжірибелі мамандарға бекітіліп беріліпті. Солардың қасында жүріп қыста жұмыс істеу тәртібін үйренуде. Қателік жөнделеді, шығынның орны толады, ең бастысы – адам өмірі, ал адам өмірі ойыншық емес, – дейді бас инженер.