Құрылғылар күтімі – қауіпсіздік кепілі

Техника қанша жерден заманауи болса да, адамның қатысуынсыз оның толық жұмыс жасауы екіталай, дей тұрғанмен, кейде қозғалыс қауіпсіздігінің бұзылуына адами фактор емес, техникалық ақау себеп болатыны да жасырын емес. Сондықтан құрылғылардың техникалық күтіміне көп нәрсе тәуелді.

Қызылорда магистральдық желі бөлімшесіне қарасты Қазалы белгі беру және байланыс дистанциясының Жосалы бекетінде СОБ электромеханиктері Қожаберген Тажиев пен Азамат Жүгінісовті станция жолдарындағы байланыс құрылғыларына ағымдық жөндеу жасап, техникалық күтім көрсету кезінде жолықтырдық. Қожаберген Тажиевтің дистанцияда жұмыс жасағанына 40 жылдан аса уақыт болса, Азамат Жүгінісовтің саладағы қызмет өтілі бесінші жылға айналыпты.

– Бекеттің оңтүстік алқымындағы 29-бағыттамалық бұрма мен М15 бағдаршамға ағымдық күтім жасау дамыз. Күтім кезінде бағыттамалық бұрма электрожетегінің ішкі тазалығына көңіл бөліп, тетіктердің контактілерінің орнықты бекітілуін тексеруден өткіздік. Электрожетек моторы мен редуктор аралық 0,15 мм-лік өлшемнің ауытқымауын бақылап, бұрманы плюске және минусқа ауыстырғандағы әрекетін өлшеп, оның белгіленген өлшемге сай болуын назардан өткіздік. Жалпы байланыс құрылғыларының техникалық талаптарға сай болуы пойыздардың қозғалыс қауіпсіздігінің сақталуына бірденбір кепілдік саналады, сондықтан құрылғылардың кідіріссіз жұмысын қамтамасыз етуге бар күшімізді саламыз, – деді тәжірибелі электромеханик Қожаберген Тажиев.

Бағыттамалық бұрманың электржетегін тексеріп болып оның қақпағын жапқан электромеханиктер рельс жиегіндегі М15-бағдаршамға техникалық күтім жасауға кірісті. Бағдаршамның қақпағын ашып, ондағы лампаға келіп тұрған ток көзі күшінің 11,5 вольт қуатында бо луын, бағдаршам жарығының берілу көрінісін, ішкі-сыртқы тазалығын және бір тексеріп барлық жағдайдың техникалық талапқа сай болуына көз жеткізген СОБ электромеханиктері келесі бағдаршамдарға, байланыс құрылғыларын тексеруге беттеді.