Қарғын сумен күрес: арнайы пойыз жасақталды

Биылғы жылы Шығыс өңірге де қар жылдағы мөлшерден көп түсті. Мамандардың сөзіне сүйенсек, қар көлемі бұрынғы жылдармен салыстырғанда 50 пайызға артық жауған. Осы себепті де Семей ЖТ бөлімшесі бойынша көктемгі су тасқынына даярлық шаралары қыс айларында басталды. Соның нәтижесінде бүгінде өңірдегі гидрометерологиялық ахуал біршама күрделі болғанымен дәл қазіргі күндері теміржол нысандарына тікелей төніп тұрған қауіп жоқ.

Басты ерекшелік сол, Семей магистральдық желі бөлімшесіне қарасты аумақ – байтақ республикамыз бойынша жауын-шашын мол түсетін әрі өзен және бұлақ, тоспасулары өте көп аймақ. Сол себептен жылдың осы мезгілі табиғаттың тосын мінезіне жоғары деңгейде даярлық жасауды талап етеді. Қазіргі күндері өңір бойынша желі бойында 103 қауіпті телім бар. Айта кетерлігі сол, бұл аумақта күн күрт жылынса, қызыл су шайып кету қаупі аса жоғары.

Сол себепті, бұл аумақ бойынша тұрақты түрде телефон байланысы орнатылып, жарықтандырылып, тәулік бойы кезекшілік орнатылды. Қазіргі күні таулардан құлай аққан қар суын бөгетсіз ағызып жіберу жұмыстары тұрақты жүргізілуде. Семей магистральдық желі бөлімшесінің бастығы Айдын Шәукежановтың жетекшілігімен арнайы жоспар жасалынып, көктемгі су тасқынының алдын алу бойынша жұмыстар қазіргі күні қызу жүргізіліп жатыр.

Оның ішінде еріген қар сулары суағарлар арқылы кәріздерге жіберіліп, су тоспалары мен өзендер және су қоймаларының деңгейі тәулік бойы бақылауға алынған. Мамандар сөзіне сүйенсек, желі бойында Семей магистральдық желі бөлімшесіне тиесілі нысандардың жалпы саны тым қомақты. Оның ішінде 472 көпір, 390 су өткізгіш құбыр, 146 су өткізгіш арық бар. Наурыздың 10 күнгі көрсеткіші бойынша НЖС-6 мекемелеріне тиесілі барлық көпір, құбырлар мен арықтар қардан толық аршылып, тазаланды. Мұнымен қоса, бөлімше бойынша көктемгі сең жүру және қызыл су тасқынының алдын алып, қажет жағдайда шұғыл жұмылдыру мақсатында қажетті техникалар қазіргі күні толығымен даяр тұр.

– Бұл ретте Семей магистральдық желі бөлімшесі басшысы Айдын Шәукежановтың назарда ұстауымен аталмыш бағыттағы жұмыстар ерте қолға алынды. Мәселен, қазіргі таңда аталмыш бөлімше бойынша 43 вагоннан тұратын 5 пойыз жасақталды. 38 платформа мен 5 жабық вагон жолға шығуға даяр тұр. Бұдан өзге арнайы әзірленген тастар мен темірбетонды шпалдар, цементтің де жеткілікті қоры бар, – дейді НЖС-6 жол бөлімінің бастығы Қайыргелді Ахметжанов.

Ерте кезеңнен қолға алынған жұмыстар көп. Мәселен, тасқын сумен күрес мақсатында 770 бірлік темірбетонды шпалдар қыс соңында әзірленген болатын. Жақын күндері тасқынға тосқын қою мақсатында бөлімше бойынша қосымша түрде цемент пен құмның, қиыршық тастың қоры еселенбек.

Мамандардың айтуынша, Семей ЖТ бөлімшесі бойынша, су шаю қаупі ең жоғары аумақтар Жаңа-Семей және Аягөз жол дистанциясының қарамағындағы телімдер саналады. Сондықтан, ПЧ-40 пен ПЧ-42 жолшыларына түсетін салмақ та жоғары болып тұр.