Қауіпсіздік шаралары түгел қамтылуда
«ҚТЖ» Жүк тасымалы» АҚ филиалы – Жамбыл жүк тасымалы бөлімшесінде әлем елдерін жайлаған пандемияға байланысты іргелі шаралар қолға алынуда. Жолаушылар тасымалы 4 сәуір күні тоқтағанымен, жүк тасымалы жүйелі жүріп жатыр.
Бірақ, мамандардың айтуынша, экспорттық, импорттық тауар тасымалына шектеулер қойылған. Бұл ең алдымен әрине, азық-түлік тауарларына ел ішіндегі қажеттілікке орай қабылданған шаралар екені даусыз.
– Жақында еліміздің Ауыл шаруа шылығы министрінің арнайы қаулысы негізінде агроөнімдердің біршама тізіміне шектеулер қойылып, экспорттауға тыйым салынғаны белгілі. Алайда, бұл ахуал біздің бөлімшеміздің жүк тасымалы көрсеткіштеріне аса әсер ете қойған жоқ. Өйткені, әлгі тізімдегі бидай, күріш, жарма секілді өнімдер біздің аймақтан өзге өңірлерге жөнелтілмейді, – дейді бөлімше басшысының бірінші орынбасары міндетін атқарушы Дүйсенбек Сыдықов.
Сарапшылардың айтуынша, төтенше жағдай осылай жалғаса беретін болса, көп ұзамай Орта Азия, Қытай елдеріне де, тіпті мемлекет аумағына да кезкелген тауар экспортына шектеулер енгізілуі мүмкін көрінеді. Қазіргі таңда Жамбыл теміржол бөлімшесі ұжымының 70 пайызға жуығы басшылықтың арнайы бұйрығы негізінде қашықтықтан жұмыс істеу режіміне көшірілген. Дүйсенбек Сыдықов алдағы уақытта қызметкерлердің онлайн жүйемен жұмыс істеуге ауыстырылуы алдағы уақытта бұдан да көбеюі мүмкін екенін жоққа шығармайды.
– Ахуалдың қалай өрбитінінен барлығымыз бейхабармыз ғой. Алай да, індеттен сақтанудың барлық шаралары жасалып жатыр. Мәселен, біз бастауыш кәсіподақ ұйымы арқылы 3 мыңға жуық медициналық маскалар алып, теміржолшыларға таратып бердік. Бұдан бөлек, антисептик бұйымдары да молынан алынып, тиісті орындарға қойылды. Күні кеше ғана Нұр-Сұлтан қаласындағы «Қазақстан темір жолы» ҰК» АҚ-нан 4500 қорғаныш бетперде, 400 литрдей антисептик келді. Бұларды мекемелерге рет-ретімен таратып отыратын боламыз, - дейді бөлімшенің жауапты өкілі. Дүйсенбек Сыдықовтың айтуынша, әзірге қашықтықтан жұмыс істейтін қызметкерлердің айлық жалақысында ешқандай өзгертулер, қандай да бір қысқартулар болмаған.