Бірінші орынға адамдар қауіпсіздігі шықты
Әлемді шарпыған коронавирус пандемиясына байланысты елімізде төтенше жағдай жарияланғалы көптеген жұмыс орындары қашықтан жұмыс істеуге көшті. Елдегі үлкен қалалар, соның ішінде елордасы да карантинге жабылды. Осындай жағдайда жаңа жұмыс режиміне көшкен темір жол мекемелерінің бірі – «ҚТЖ-Жүк тасымалы» АҚ– на қарасты Нұр-Сұлтан станциясы.
– Карантин – бұл ауру жұқтырған немесе дерт жұқты деп күдікке алынған адамдармен байланыс орнатуға, жануарлар, жүктер, тауарлар, көлік құралдары, елді мекендер, аумақтар, аудандар мен облыстар бойынша өзара қатынасты шектеуге бағытталған тыйым салу және режимді эпидемияға қарсы шаралар кешені. Осыған орай көптеген жұмыс берушілер өз жұмысын уақытша тоқтатуға мәжбүр болды. Ал біздің станция «ҚТЖ» ҰК» АҚ басқарма төрағасы Сауат Мыңбаевтың №30-Ц бұйрығына сәйкес қашықтан жұмыс істеуге көше отырып, барлық күшті станция қызметкерлерінің індет жұқтыруын болдырмауға бағыттауда, яғни бірінші орынға адамдар қауіпсіздігі шықты, – дейді станцияның бас инженері Бақытхан Әбеуов.
Бас инженердің мәліметінше, станцияның 8 сағаттық кестемен жұмыс істейтін әкімшілік-басқару аппаратының қызметкерлері қашықтықтан жұмыс істеуге көшірілген. Олардың өз қызметтік міндеттерін орындауы мобильді қосымшалар арқылы бақылауға алынып отыр. Қашықтықтан жұмыс істейтін теміржолшылар таңертең сағат 9-дан кешкі 18.30-ға дейін үйде болулары керек, себебі әзірге олардың үйлері жұмыс орны болып табылады. Ал әкімшілік-басқару аппаратынан бөлек, тікелей өндірісте жұмыс істейтін жұмысшы-қызметкерлер жұмыстарын жалғастыруда.
Станция қорғаныш маскалары және антисептикалық құралдармен толық қамтамасыз етілген. Қауіпсіздік және еңбек қорғау секторы тарапынан жұмысшылардың гигиеналық-санитарлық нормаларды орындауы, бір реттік 3-М FFP-1,2 NR D үлгісіндегі қорғаныш маскаларын тәулік сайын алуы, жұмыс орындарына антисептикалық құралдардың үлестірілуі күнде қадағаланып отыр.
Жұмыс орындары тұрақты зарарсыздандырылуда. Жасы 55-тен асқан, күшейтілген карантин жағдайында қоғамдық көліктер қатынамайтын жақын маңдағы елді мекендерде тұратын қызметкерлер еңбек демалысына жіберілген. Станция торабындағы ауысымдық жұмысшыларды жұмысқа апарып-әкелетін қызметтік автобустар шығарылып, олардың елордадағы қозғалысы бойынша қала әкімдігінің рұқсатымен бағдарлық схемалық кестесі жасалған.