Жұмыла көтерген жүк жеңіл
Маңғыстау облысы бойынша меншікті тілші
Маңғыстаулық вагон қараушылар бүгінгідей қиын қыстау кезеңде жұмыста жүріп те ел басына іс түскен сынақты сәтте өзгелерге қол ұшын созуда. Техникалық қызмет көрсету пунктінің бастығы Ербо лат Сәулебаев бастаған ерікті жандар ауыл мешітіне 50 үйге арналған ең қажетті азық түліктерді жеткізіп берді.
«Жұмыла көтерген жүк жеңіл» демекші, мұндай уақытта олардың әйелдері де қарап отырған жоқ. Қолдарына ине-жіп алып, теміржолшыларға бетперде тігуге көшкен. Соның арқасында Маңғыстау вагондарға техникалық қызмет көрсету пунктінің нұсқаушысы Владимир Сүлейменов өз әріптестеріне 100 дана, вагон қараушы Пернехан Әлжанов 30 дана маска таратты. Тағы бір вагон қараушы Қуатбек Көпбаев өзі тігін машинасына отырып, өз қолымен 70 дана бетперде тігіп, әріптестерімен қатар жағдайы төмен отбасыларға үлестірді. Бетперделердің барлығы да көп реттік қолдануға арналған. Матасы да соған сай таңдалған.
− Еліміздегі аты жаман індеттің таралуына байланысты қазір дәріханаларда қорғаныш бетперделері жоқтың қасы. Оны тапқан күнде де күніне бірнешеуін пайдалануға тура келетіндіктен маска көп қажет болады. Сондықтан неге сол масканы өзіміз тікпеске деп ойладым. Оны отбасым да қолдап, анам қажет маталарын өзі таңдап әкеліп берді. Жұмыстан қолым босай салысымен бетперде тігуге кірістім. Әрбір адам - еліміздің құнды дүниесі. Сол үшінде әр теміржолшының денсаулығы еліміз үшін де, компаниямыз үшін де өте маңызды. Мен де сол құндылықты сақтауға сәл болса да үлес қоса алған болсам, қуаныштымын. Біз бұл сынақты да бірлікпен еңсереміз, – дейді вагон қараушы Қуатбек Көпбаев.