Ұрлықшылар жауапкершіліктен құтылмайды

Маңғыстау жол дистанциясында биылғы жылдың бірінші тоқсанында теміржол мүлкін ұрлау дерегі тіркелмеді. Ал өткен жылы осы кезеңде 6 бірдей ұрлық оқиғасы болған.

Дегенмен «Сақтансаң сақтайды…» дегенді басшылыққа алған дистанциялықтар қырағылықты босаңсытқан емес. Маңғыстау жол дистанциясының жетекші инженері Мұхтар Құлшанбаев айына үш реттен елді мекендерді аралап түсіндіру жұмыстары жүретінін айтады. Ай сайын бір рет теміржол күзетімен бірлескен рейд те бар. Үстіміздегі жылы ешқандай ұрлық тіркелмегені осындай профилактикалық жұмыстардың нәтижесі көрінеді.

– Адамдар пайда табу мақсатымен теміржолдың үстіңгі қабат материалдарын қолды етеді. Өткен жылы осындай 15 оқиға орын алып, сонша қылмыстық іс қозғалды. Ал бұл бөлшектер өз орнында жоқ болса қозғалысқа қауіп төнді деген сөз. Теміржолмен жүретін де сол ұрлықшылардың өздері сияқты халық емес пе? Соны неге адамдар ойламайды? Азғана тиын-тебен үшін өзгелердің өміріне қауіп төндіру – барып тұрған қылмыс екенін санасы бар адам түсінсе керек қой. Қозғалысқа қауіп төндіргені үшін әр қылмыстың жазасы бар. Қылмыскерлер бәрібір ұсталады, жауапкершіліктен құтылып кете алмайды, сондықтан оңай әрі арам олжа табам дегендер алдымен ойлансын дер едім, – дейді дистанция маманы.