Вагон қараушылар біліктілігіне сын

Теміржол көлігінде тасымалдау үдерісін қамтамасыз етуші мекемелер үшін қозғалыс қауіпсіздігінің сақталуы – басты шарт. Сондықтан Маңғыстау вагон пайдалану депосында пойыздардың қозғалыс қауіпсіздігі қашанда бірінші орында.

Осы тұрғыда өңірдегі вагон депосы Маңғыстаудың үстімен өтетін вагондарды қатаң бақылап, ақаулықтарды дер кезінде анықтап, теміржолдағы қауіпсіздікті сақтауға үлкен үлес қосуда. Бүгінде депо көлемінде желтоқсанда басталған «Бүйірлік рамаларға бақылау» төрт айлығы жүріп жатыр, ол сәуірдің 23-не дейін жалғасады. Тек осы айлық аясында жергілікті вагон қараушы- жөңдеушілер 17 бүйірлік рамасынан түрлі деңгейдегі ақаулықтарды анықтады.

− Анықталған ақаулы вагондар дер кезінде ағымдағы жөңдеу тұйығына ағытылып ВУ-41 формалы наразылық актілері толтырылды, арнайы өкілдерді шақырту жөнінде нұсқау жеделхаттар жіберілді және жөңдеуден өтті. Жалпы, осы іс шара аясында болсын, басқа уақыттарда болсын, біздің вагон қараушыларымыз жылжымалы құрамдарға техникалық қызмет көрсету кезінде доңғалақ жұбына, арбашықтардың құймалы бөлшектеріне аса қырағылықпен қарайды. Себебі соңғы уақыттары пойыздар қозғалысына қауіп төндіретін аса қауіпті ақаулар – бүйірлік рамалардың сынуы жиілеп кетті. Ондай жағдайлар пойыздар қозғалысы қауіпсіздігінің бұзылуына әкеліп соқтырады. Рамалардың сынығы вагондардың жолдан шығып кетуіне және соның салдарынан теміржол инфрақұрылымының, басқа да нысандардың зақымдалуына себеп болуы мүмкін. Оған қоса соңғы кездері жүк вагондары арбашықтарындағы бүйірлік рамаларда құйылым дефектілерінің жиілеуі де көп кездесуде, – дейді Маңғыстау пайдалану вагон депосының шебері Қамшыбай Бисенғұлов.

Шебердің сөзіне сүйенсек, бүйірлік рамалардың сынуына бірден-бір себеп вагон жасау және құрастыру кәсіпорындары шығарған құйылым бөлшектері өнімдерінің сапасыздығы. Осындай салдарды ескерген Маңғыстау пайдалану вагон депосы аталған айлық аясында қырағылықты күшейте түскен. Осыған орай арнайы шара жасақталып, вагон депосы мен вагон қарау қосындарында жиындар өтіп, хабарландырулар ілінген. Нәтижесі де жоқ емес, осы жылдың бірінші тоқсаны бойынша маңғыстаулық вагон қараушылар жалпы 30 вагоннан ақаулық анықтаған. Соның ішінде 17 вагонның бүйірлік рамасынан, 7 вагонның букстық торабынан, 7 вагонның автотіркегіш құрылғысынан және 1 вагонның серіппе үстіндегі арқалығынан кемшіліктер тапқан. Депода наурыз айының 1-31 күндері аралығында жүргізілген «Тежегіш құрылғыларына басты назар» атты тағы бір айлық жарияланып, оның аясында да арнайы іс-шаралар жоспары жасақталып, тежегіштерге аса назар аудару керектігі жөнінде нұсқаулықтар өткізілген. Түнгі тексерістер ұйымдастырылған. Барлығы 36 тексеріс өтіп, соның 15-і түнде кенеттен жүргізілген. Мұның бәрі вагон қараушылар біліктілігіне сын болғаны анық. − Жоғарыдағы көрсетілген нақты жағдайларға орай Маңғыстау вагон депосының вагондарды қарап-жөндеушілері пойыздар қозғалысына қауіп төндіретін ақауларды анықтап, теміржол апатының алдын алуда деп айта аламыз. Сондықтан алғашқы тоқсан қорытындысы бойынша 30 вагон қараушыны «ҚТЖ-ЖТ» АҚ басшылығының марапатына ұсындық. Олардың қатарында Бейнеу вагондарға техникалық қызмет көрсету қосынынан: Мейрамбай Жәриев, Еркінбек Тұрамбаев, Исатай Сали, Райымбек Шынтеміров, Байзақ Битанов, ал Маңғыстау қосынынан Жанарбек Якупбаев, Берік Дүйсенбаев, Сапарбек Тоғашев, Жадырасын Багытов, Досжан Жұматов, Есет Камалов сынды вагоншылар біліктілігінен сын болған сынақтан сүрінбей өткен мамандарымыз бар, - дейді Қамшыбай Бисенғұлов.