«Көк қуалап» жайылған мал көбейді...
Қызылорда облысы бойынша меншікті тілші
Ағымдағы жылдың алғашқы тоқсанында Қызылорда магистральдық желі бөлімшесі бойынша пойыздардың қозғалыс қауіпсіздігін сақтау шаралары қатаң сақталып, қозғалысқа кедергі келтіретін апат, тосын оқиға секілді жағдайлар тіркелмегенмен, өкінішке орай, жолға мал мен жанның шығуы сиремеген.
Бұл жайында бөлімшенің қозғалыс қауіпсіздігі бөлімінің бас маманы Бақытбек Сәрсенов мәлімдеп, қозғалыс қауіпсіздігін сақтауды арттыру шараларынан хабар берді. Маманның пікірінше қазіргі төтенше жағдай кезінде әрбір теміржолшы өз міндеттерін, тіпті бірқатары қашықтан жұмыс істеу тәсіліне көшсе де жоғары жауапкер шілікпен атқаруда. Магистральдық желі бойымен жүйткіген пойыздар саны төтенше жағдайға байланысты сирегенмен жүк пойыздарының қозғалысы сақталуда. Ал көктемнің келуімен далада «көк қуып» иесіз жайылған мал көбейіп, қозғалысқа қауіп төндіріп жатқаны да шындық.
– Жылдың алғашқы тоқсанындағы жағдайға тоқтала кетсек, бөлімше телімдерінде тепловоз машинистері 15 рет шұғыл тежегіш қолданған, оның ішінде 4 жағдайда мал басу оқиғасы, 7 жағдайда жолға қараусыз малдың шығуы және 4 жағдайында адамдардың белгіленбеген жерден жолды кесіп өтуінен орын алған. Өкінішке орай 3 адам басу оқиғасы тіркелді. Олар қаңтар айының 8-ші, 21-ші, 23-ші жұлдыздарында Қызылорда-Қараөзек, Қызылорда-Белкөл аралықтарында абайсызда пойыздың астына түсіп қайғылы жағдайға душар болды. Олардың екеуі оқиға орнында қайтыс болып, біреуі екі аяғынан айырылып, мүгедек болып қалды. Міне, осы деректерді алға тарта отырып, темір жолды рұқсат етілген жерлерден ғана және өте сақтықпен өту керектігін ескертуден кенде емеспіз, – дейді қозғалыс қауіпсіздігі бөлімінің бас маманы.
Десе де, жүргізіліп жатқан ісшараларға қармастан темір жол төңірегінде мал бағу ережелерінің сақталмауы салдарынан қараусыз малдардың жолға шығуы, автокөлік иелерінің теміржол өтпесінен өту ережесін сақтамауы сынды келеңсіздіктер тыйылмай отырғаны қынжылтатынын айтады маман. Жергілікті тұрғындарға малын қараусыз қалдырмауын түсіндіріп бөлімше теміржолшылары карантин кезінде де жұмыс жүргізіп, жергілікті атқарушы билік орындарына хат жолдауда.
– Бірақ одан нәтиже көре алмай отырмыз. Көктемнің келуімен тұрғындар қыс бойы қорада тұрған малын көкке жайылсын деп шығарып жіберу көбеюде. Азаматтарға темір жолдан өту мен жол бойында мал бағу ережелерін қатаң сақтамаған жағдайда кінәлілер ҚР Әкімгершілік Кодексінің 559-тармағының 1-тармақшасы бойынша әкімшілік жауапкершілікке тартылатынын және келтірілген шығындарды өтейтіндерін тағы ескертеміз, –дейді Қызылорда магистральдық желі бөлімшесінің қауіпсіздік бөлімінің бас маманы Бақытбек Сәрсенов.