Өз күштерімен өткізіп жатыр

Елдегі төтенше жағдайға байланысты биыл көктемгі тексеруге комиссиямен шығуға тыйым салынуына байланысты, әр мекеме басшылықтың қадағалауымен тексерісті өздері өткізетін болды. Соған сәйкес, Атырау жүк тасымалы бөлімшесінде тексеру жұмыстары сәуір айында басталды.

Онда қозғалыс қауіпсіздігі, еңбек қорғау және қауіпсіздік техникасы, техникалық құралдардың, ғимараттардың жай-күйі, байланыс, электр құралдарының жағдайы, вагондардың жағдайы, темір жолдың қазіргі күйі, сондай-ақ теміржолшылардың білім мен біліктілігі, жеке мәслелелері де қаралуда. Ганюшкино-Д.Нұрпейсова телімі, ГанюшкиноИсатай, Исатай-Қызылжар телімдері, сонан кейін Махамбет, Атырау, Ақжайық, Мақат станциялары, Мақат-Құлсары, Сағыз-Мақат телімдері, телімдердегі жол, сигнализация, энергиямен қамту дистанциялары, вагон, локомотив деполары, т.б. құрылымдық бөлімшелер басшылығы өздері тексеріс жүргізіп, сол жерлерде талқылау жұмыстарын да жүргізуде.

Жалпы, биылғы жылдың үш айында пойыз және маневрлік жұмыстарда өңірде өндірістік жарақат алу оқиғасы болған жоқ. Бөлімшеде пайдаланым көрсеткіштерін орындау бойынша нәтижелер жақсы деңгейде келе жатыр.

«Ал былтырғы тексеріс кезінде орын алған станцияларға тән кемшіліктер – темір жол торабында болған келеңсіз жағдайлар тіркеле бермейді, станция қызметкерлері тарапынан нұсқаулықтар дұрыс жүргізілмесе, кейбірінде радиобайланыс жеткіліксіз болып қалады.

Станцияларда кезекшілер жаңа нұсқаулықпен жұмыс жасауға біртіндеп көшуде, білімін жетілдіру, жүк қабылдап-жөнелту бойынша ескертпелер болды. Жол дистанциялары бойынша, кейбір учаскелерде, шпалдың және рельстің, бұрмалардың ақаулығынан жылдамдықты шектеуге тура келген. Сондықтан бұл кемшіліктерді жедел қалпына келтіру қажет.

Сигнализация және байланыс дистанциялары бойынша негізінен электр желілерін, бағыттамалы бұрмаларды сыртқы тексеруді, рельс шынжырларының оқшаулау элементтерін тексеруді жүргізу және жөндеу бағытындағы кемшіліктер болды. Вагон қараушылар тарапынан вагонды қарау кезінде қозғалыс қауіпсіздігіне әсер ететін кемшіліктер анықталмай жатады.

Локомотив шаруашылығы бойынша машинист-нұсқаушылар тарапынан пойыздың жүруі, автотежегішті басқару, машинистке қатысты басқа да кемшіліктерді анықтау қажет. Локомотив бригадаларының бақылау-нұсқау сапарлары, пойыз машинистерімен радиобайланыс дұрыс ұйымдастырылмаған жайттары да кездесті.

Вокзалдар мен жүк тасымалы бөлімшесіне қарасты барлық разъезд ғимараттарын әктеп-сырлауға, айналаны таза ұстауға көңіл бөлу қажеттігі ескертілді. Биыл осы олқылықтар жойылып, бәрі қалпына келді деп есептейміз. Тексеру қорытындысы туралы әр құрылым жазбаша түрде есеп береді» дейді Атырау жүк тасымалы бөлімшесінің өндірістік-техникалық бөлім бастығы Темірхан Аманқұлов.