24 сағат жұмыс орнында
Шымкент қаласы бойынша меншікті тілшісі
Түркістан станциясындағы вагондарға техникалық қызмет көрсету пунктінің мәліметіне сүйенсек, жыл басынан бері алғашқы тоқсанда орта тәулікпен 60 вагон ағымдағы жөндеуден шығады екен.
Осынау тәулік бойы тіршілігі толассыз жүріп жататын вагон қарау пунктінде бүгінде 48 теміржолшы еңбек етеді. Төтенше жағдай мен қалаға енгізілген карантинге қарамастан олардың барлығы да өз орындарында жұмыстарын ауысыммен жалғастыруда.
Аталған қызмет көрсету орталығының әкімшілік ғимараты мен вагон жөндейтін цехта күн сайын санитарлық-дезинфекциялық талапқа сай жұмыстар жүргізіліп отырады. Кіреберіске орнатылған антисептик дозаторы мен маскалық режимдегі жұмысшылар тазалық пен тәртіпті өздері үшін де қатаң ұстануда.
«Қазіргі кезде жолаушылар пойызы тоқтап қалды ғой, жүріп тұрған кезде Түркістан-Шиелі бағытынан күніне 6-7 пойыз қабылдайтынбыз. Ал жүк пойыздарына тоқталсақ, Түркістан-Шиелі бағытынан күндігіне 10 пойыздан, ал айына 320 жүк пойызын өткіземіз. Ол жақтан да қайтадан 325 пойыз қабылдап аламыз. Жалпы, Түркістан станциясынан тәулігіне 11 мың вагонды қарап, тексеріп шығамыз. Станцияда 21 кіреберіс жол бар. Сол жерден қаншама вагондар келеді. Соның барлығының аман келіп, аман кетуі басты назарда. Біз тәулігіне 24 сағат жұмыс орнындамыз», – дейді вагондарды тексеруші-жөндеуші Нұрхан Сыздықов.
Вагондарға техникалық қызмет көрсету мен ақау анықтауда Илмат Маханов, Жақып Арапов, Әбдімомын Нұрханов, Бердіхан Байжекеев, Арипжан Байметов сынды вагоншылар шеберлігімен ерекшеленеді екен.