Жазғы тасымалға дайындық

Маңғыстау локомотив пайдалану депосында жазға дайындық жұмыстары қызу қарқын алған. Депода сәуір айының 10-нан көктемгі комиссиялық байқау басталған еді. Бүгінде көктемнің әр күнін тиімді пайдалануға тырысқан локомотившілердің әрқайсысы өзіне берілген тапсырмамен әуре.

Міндеттелген жұмысты өз межесінде аяқтауға күш салудан бөлек, «бәрінің илегені бір терінің пұшпағы» болғандықтан, жазғы тасымал маусымына темір тұлпарлардың жарақты болуы бәріне салмақ екенін ұжымның әрбір мүшесі жақсы түсінеді.

Комиссиялық байқаудың алдын ала отырысы болып, жоспар бекітілген болатын. Онда қолынан жөндеу, сырлау сынды жұмыстарға икемді, шебер жігіттер таңдап алынды. Олардың қатарында машинистер Қанибек Сейдалиев, Ерлан Айтбаев, Зинадин Абдуллаев, Берік Ыбраев, Кенжебек Мунатбаев, Оразғали Қыдыров, көмекші машинистер Бейбарыс Қайыров, Ерлан Боранбаевтың бригадалары бар. Бұл бригадалар бүгінде тепловоздарды жуып, тазалап, кузовын, жүріс бөлігін тексеріп, сырлап, жазғы маусымға дайындауда. Осыған дейін олар 27 тепловозға осындай дайындау жұмыстарын жүргізіп үлгерді.

− Паркте 55 дана 2ТЭ10 МК тепловозы және 15 ТЭМ-2 тепловозы бар. Содан қазірге дейін локомотив бригадаларымыздың арқасында 27 тепловоз сырланып, жазғы кезеңге жұмыс істеуге сақадай сай болды. Тәжірибелі машинистер мен олардың көмекшілері тапсырылған жұмыстарын ұқыпты және тиянақты орындап шығуда. Көктемгі комиссиялық байқаудың бекітілген жоспары бойынша темір тұлпарларымыздың техникалық жағдайын жақсарту, тазалау-сырлау, жұмыс жасау принципін жаздық тәртіпке ауыстыру жұмыстары мамыр айының соңына дейін жалғасады, – дейді Маңғыстау локомотив депосының бастығы Сәдібай Күзембаев.