Түркістанға көш жалғасады
Тәуліктің кез-келген уақытында қыз-қыз қайнап жататын Ұлы Жібек жолы бойында жатқан көне қала Түркістан облыс орталығы болғалы күрт өсіп жатыр. Бірақ, елдегі төтенше жағдайға байланысты тірлігі қыз-қыз қайнап жатқан қалада бүгінде тыныштық орнаған.
Ғасырдан аса тарихы бар қала қақпасы теміржол вокзалы маңы да тым-тырыс. Тәулігіне 22 жұп жолаушылар пойызы, ағыл-тегіл жүк пойыздары жөңкіліп жататын жолдар мен перрондар бос, мыңдаған жолаушыларға қызмет көрсететін теміржолшылар мен ұсақ саудагерлердің де қызметі тоқтаған.
Барлығы бір жаққа ауып көшіп кеткендей әсер қалдырады. Қазіргі кезде тек қана жүк пойыздарының қозғалысы бар. Қалған теміржолға қатысты оннан астам мекемелер тоқтатылып, жұмысшылары демалысқа жіберілген. Теміржол вокзалының іші залалсыздандырылып, толығымен жабылған.
Түркістан теміржол вокзалының басшысы Қанат Сейдулдаевтың айтуынша, қаланың бас қақпасының тізгіні қала әкімдігіне беріліп, ішкі жағындағы Абылайхан алаңында күрделі жөндеу жұмыстары қарқынды жүргізілуде.
Карантин мерзіміне берілген уақытты сәтті пайдаланып, вокзалдың қабылдау жақ бетінде де төселген тастары алмастырылуда екен.
«Түркістанға көш әлі де жалғасады. Сондықтан абаттандыру жалғаса береді, ауқымды алаң барынша айшықтандырылып, гүлзарлар, субұрқақтар салынуда. Абылайхан ескерткішінің кетілген тұстары қайта қалпына келтірілуде», дейді вокзал бастығы.
Ертеректе тұрғызылған Абылайхан ескерткішін қаланың орталығындағы даңғылда немесе Яссауи кесенесі алдындағы саябақта орналасқаны дұрыс деген пікір бар екен. «Абылайханның айбынды ат үстіндегі ескерткіші сол орталықта тұруы керек, ал бұл жерде Қазақстан темір жолының қалыптасуына мол үлес қосқан Тұрар Рысқұлов немесе Түрксібті көтерген Мұхамеджан Тынышпаевтың ескерткіші тұруы тиіс» деген пікірде теміржолшы-ардагер Баймахан Әкімбеков.