«Вагонсервис» үздіктер қатарындағы ұжым

«Вагонсервис» АҚ-ның жолаушы вагондарын жөндеу жөніндегі Батыс филиалы жылдың алғашқы тоқсанын жоғары нәтижемен аяқтады. Қозғалыс қауіпсіздігін қамтамасыз етуде айтарлықтай көрсеткішке жеткен ұжым, республика бойынша алғашқы үштіктің қатарынан көрініп отыр.

«ҚТЖ» ҰК» АҚ бойынша «Вагонсервис» АҚ-ның үш филиалы бар. Оңтүстік пен Солтүстік аймақтарымен салыстырғанда Батыс бөлімшесі ең үлкен филиал болып саналады.

Яғни ең үлкен жұмыс көлемі де осында. Ақтөбе, Орал, Атырау, Қызылорда, Ақтау және Түркістан секілді алты қаладағы телімдер Ақтөбеден басқарылады. Филиал басқалармен салыстырғанда екі есеге дерлік артық вагондарға қызмет көрсетуіне қарамастан онда қозғалыс қауіпсіздігінде кемшіліктер жоқтың қасы. 2019 жылы қозғалыс қауіпсіздігіне қатысты бірде бір кемшілік, ақау тіркелмеген. 2020 жылдың алғашқы тоқсанында да қозғалыс қауіпсіздігінде кемшіліктер жоқ.

Бұл – өте жақсы көрсеткіш. «Вагонсервис» АҚ жолаушылар вагондарын жөндеу жөніндегі Батыс филиалы директорының орынбасары Жандос Алпысбаевтың айтуынша, 2020 жылдың төрт айында Техникалық қызмет көрсету -1 (ТКҚ1) талабымен, яғни рейс алдындағы техникалық тексеріс бойынша 12 143 вагон дайындалған.

Техникалық қызмет көрсету -2 жөндеу түрі бойынша жазғы тасымалдаудың алдында жоспарлы түрде жөндеуден 133 вагон өткен. Сондай-ақ, Техникалық қызмет көрсету -3 жөндеу түрімен алты айда өткізілетін ревизиялық жұмыстар бойынша 274 вагонға қызмет көрсетілген.

Салыстыра кетсек, Батыс филиалы бойынша 2019 жылы Техникалық қызмет көрсету -1 талабымен 53 мың 27 вагон дайындаған еді. Техникалық қызмет көрсету -2 жұмыстары негізінде 522 вагон жөнделіп, ТКҚ-3 бойынша 976 вагон ревизиядан өткен.

Филиалдағы барлық жұмыстар жоспар бойынша жүзеге асырылуда. Кешігу не кейінге қалдырылған жұмыстар жоқ. Вагондардың тоқ беру жүйесі, доңғалақтары, аккумуляторлары, есік-терезелері, жалпы техникалықматериалдық жағдайы мұқият қаралып, күрделі жөндеу жұмыстары уақытында жасалып жатыр.

– Ұжымда қазір 1126 адам жұмыс істеуде. Олардың дені тәжірибелі электрик, моторист, аккумуляторшы, вагон жуушы, эпикировшыжабдықтаушы секілді мамандар. Жолаушылар пойызының жарақты болуы ең алдымен оның жөндеу сапасына байланысты. Сондықтан вагон жөндеу жұмысында ең алдымен қауіпсіздік пен сапалы қызметке баса көңіл бөлінеді. Жолаушылар вагонның таза болып, жарық пен су, шайдың қайнап тұруы, желдеткіштің жұмыс жасауы сынды ең басты қажеттіліктерге ғана көңіл бөліп жатады. Олар біздің толып жатқан бөлшектер мен тораптардан тұратын жылжымалы құрамның барлық техникалық қауіпсіздігіне жауап беретінімізді біле бермейді. Тексеріс кезінде әсіресе, тежегіш жүйесі, қосалқы дөңгелек, автотежегіштің жұмыс жасауы қатаң бақыланады, – дейді вагон депосы бастығының орынбасары.

Қазіргі уақытта мекемеде вагондарды қысқы және жазғы тасымалдаудың алдындағы жоспарлы түрде жөндеуден өткізуді қамтитын ТКҚ-2 жұмыстары жасалып жатыр. Вагондардың іші-сырты боялып, санузелдер мен су қайнатқыштары ауыстырылып, желдеткіштер жұмысы тексерілуде.

Сонымен қатар, терезелерді ашу, вагондарды толық тазалау секілді жұмыстар да осы кезде өтеді. Филиалдың басты ерекшелігі - 1997 жылдан бастап үздіксіз жұмыс жасап тұрған автоматтандырылған вагон жуу қондырғысы. Бұл тек Алматы және Ақтөбе филиалдарында ғана бар. Ақтөбеде алдымен пайда болған.

Тазалау кезінде жұмысшы күші қолданылмайды. Арнайы машина арқылы қас қағым сәтте бірнеше вагон тазартылады. Соның арқасында, яғни осы автоматтандырылған вагон жуу қондырғысының арқасында бір күнде 50-60 вагон тазалау мүмкіндігіне қол жеткізіп отыр.

– Жалпы, 655 вагонға тұрақты қызмет көрсетеміз.144 вагон - Қытай өндірісінен шыққан вагондар. 2019 жылы Ресейден әкелінген 73 жаңа вагон бар. 59 украиналық вагон және 165 ескі вагон бар. Барлығы 13 пойыз және 20 шақты тіркелмелі вагондарымыз бар. Вагон жөндеу, қозғалыс қауіпсіздігі бойынша бүгінгі таңда бірінші орында екенімізді мақтанышпен айта аламыз, - дейді ол.

Филиалдың осындай жетістіктерге жетуіне вагоншылар ұжымын бес жылдан бері басқарып отырған тәжірибелі теміржолшы Теміржан Төреханұлының үлесі зор.