Сақтандыру жұмыстары нәтижелі

Шымкент станциясы теміржолда қайғылы оқиғалардың алдын алу, бөгде адамдардың жолды кесіп өтуін тоқтату үшін күресті тоқтаусыз жүргізіп келеді. Жыл басында теміржол қауіпсіздігін қамтамасыз ету туралы ұйымдастыру-техникалық шаралары негізінде үйлестіру кеңесі құрылған.

Осы жоспарға сәйкес, қазіргі кезде станцияда ай сайын тиісті жұмыстар жасалып жатыр. Атап айтқанда, салалық мекемелермен бірлесіп станция паркі талапқа сай жаңартылып шықты.

Станцияда келетін-кететін пойыздармен жолаушыларды дер кезінде хабарландырып отыру, маневр жұмыстарын құлаққағыс етіп отыру – талапқа сай мүлтіксіз жүргізіледі.

Жыл басынан бері «Теміржол – аса қауіпті аймақ» атты тақырыпта тұрғындармен екі кездесу өткізілсе, Көлік полициясы және ӘТЖК, ПЧ теміржолшыларымен бірлескен 3 рейд ұйымдастырылған. Әсіресе адамдар көп өтетін станциядағы жұп дөңестегі өткелдер басты назарға алынып, сол жерде жиі-жиі кезекшілік ұйымдастырылып, азаматтарға қажетті кеңестер жазылған кітапшалар, буклеттер таратылып, теміржол ережесін қатаң сақтауға шақырды.

«Біз, станциялықтар, әскерилендірілген күзет және желілік полициямен бірлесіп №31 мектептің 7-11 сынып оқушыларына екі лекция өткіздік. Оқушыларға теміржолда құлаққап тағудың өте қауіпті екенін, пойыздың даусын естімей қалып, абайсызда мерт болуы мүмкін екендігін ескертіп, мысалдар келтірдік.

Ай сайын дауысзорайтқыш құрылғылардың үздіксіз және ақаусыз жұмыс істеп тұрғандығын да тексеріп шығамыз. Егер қандай да бір ақау табылса, мерзімі өтсе, кемшілікті анықтап, ретке келтіріп отырамыз.

Табылған кемшіліктерді арнайы журналға тізіп отырамыз. Себебі ол алдағы жұмысымызға да қажетті қауіптің алдын алуға үйретеді. Осындай жұмыстардың арқасында болар, станцияда биылғы жылы бүгінге дейін ешқандай бөгде адамдарды пойыз қағып кету фактілері тіркелген жоқ», – деді Шымкент станциясының жетекші инженері Гүлжайна Талғатқызы.