Жауапкершілік жүгі ортақ

Жосалы станциясындағы оңтүстік алқымда жұмыс істеп жатқандар Қазалы жол және белгі беру дистанцияларының жосалылық телімінің теміржолшылары екен. Олар бүгін бекеттің оңтүстік алқымындағы станциялық жолдарға техникалық күтім жасау жұмыстарын бекітілген кесте бойынша өткізіп, пойыздардың қозғалыс қауіпсіздігін сақтауға өз үлестерін қосуда.

Станция жолындағы 13-ші бағыттамалық бұрмаға күтім жасау жұмысы Қазалы жол дистанциясының Жосалы телімінің жолшылары күшімен, СОБ аға электромеханигі Жаңабек Кемелбаевтың басшылығымен өткізілуде екен.

Ауа-райының қолайсыздығына байланысты күннен қорғану үшін бет-ауыздарын тұмшалап алған теміржолшылар жол қауіпсіздігін сақтау үшін еш кедергіге мойын алдырмастан өз жұмыстарын атқаруда.

Бірі шаблонмен рельс пен бағыттамалық бұрманың үшкір ұшының арасын өлшемге алса, екінші бірі оның өлшемін бақылауға алып бұрма білегінің тартымын тексеруде, ал жолшылар болса құралдарымен бекіту, нығайту жұмыстарын атқаруда. –

Пойыздар жүріп жатқандықтан біздің жауапкершілігімізге тапсырылған жұмыстардың уақытылы жүргізілуіне жауаптымыз, оны орындау үшін бізге ештеңе кедергі болмайды.

Пойыздардың қозғалыс қауіпсіздігінің сақталуын арттыру үшін бүгінгі графиктік жұмысты жол дистанциясының теміржолшыларымен бірге атқарудамыз.

Техникалық күтім жұмыстары әр апта сайын жүргізіледі. Өлшем кезінде бұрма ұшы үшкірінің негізгі жолға кіріге отырып ашылып-жабылу өлшемі қолымыздағы 2 мм, 3 мм және 4 милиметрлік өлшемі бар шаблонмен жасалады.

Бағыттамалық бұрма ұшы мен рельс арасы техталап бойынша 2 мм саңылаумен жабылуы керек. Мына 13-бағыттамалық бұрма ұшының ауытқуын қажетті өлшемге келтіріп бекітіп, бақылаудан өткіздік, – деп тәптіштей түсіндірді СОБ аға электромеханигі Жаңабек Кемелбаев жүргізіліп жатқан жұмыс жайын.

Қауіпсіздік теміржолшылардың бәріне ортақ, десек те, электромеханик Талғат Телеубаев, жол дистанциясының жолшылары Ғали Нұржанов, Нұрлан Ақышев пен Мұрат Құдабаевтардың еңбегін ерекше атап өтті.

– Жұмыс кезінде біздер бағыттамалық бұрманың электрге қатысты және өлшем алу жұмысын жасасақ, жолшылар рельс бекітпелерінің бекітілуін тексеріп, күтім жасады, жолдардың шөп-шаламнан тазарту жұмыстарын атқарды. Біріміздің жұмысымызды екіншіміз бақылау жасап, тексеріп отырамыз, өйткені, жауапкершілік бәрімізге ортақ, – деді аға электромеханик.