Мал мен масадан қорғануда...

Дегелең-Семей телімінің 270,2 шақырымында орын тепкен шағын ғана Шаған станциясының теміржолшылары үшін биылғы жаз қос бірдей қолайсыз жайтпен басталды.

4-ші класты Шаған станциясында бүгінде 70 шақты теміржолшы еңбек етуде. Басым көпшілігі – жолшылар. Қазіргі күні тек ағымдық жұмыстар жүргізіп жатқан жол шаруашылығының мамандары станция қызметкерлерімен бірлесіп желі бойындағы малды қайыруға да жұмылуда.

– Расында да бұл аумақтың бір ерекшелігі – ірі қара мал ұстайтын шаруашылықтар көптеп орын тепкен. Сол себепті көп жағдайда теміржолшылар атқа мініп, желі бойындағы иесіз түлікті қайыруға шығады. Қазіргі күні бұл бағытта тек қожалық иелеріне хабарласып, ескерту жасаумен ғана шектеліп отырмыз. Аймағымызда карантиндік шектеулер күшінде болғандықтан жиын өткізуге болмайды, – дейді бұл ретте станция басшысы Айдос Тоқтаров.

Дегенмен шағандық теміржолшылардың күш салуымен станцияға қарасты желі бойында шұғыл тежелулер болмапты. Ал екінші кезектегі мәселе – кәдімгі қанатты жәндік масаның жылдағыдан аса көптігі болып тұр. Қансорғыш жәндіктер әсіресе жаңбырдан кейін бұлт тәрізді қаптап, желі бойында қызметін атқарып жүрген теміржолшыларды шыдатпауға айналуда.

Теміржолшылар арнайы бетперде әзірлеп тігіп, қорғаныш киім киюге мәжбүр болыпты. Шаған шағын станция болғандықтан мұнда дезинфекциялық жұмыстар жүргізілмейді. Сондықтан, теміржолшылар ғаламтордан қажетті кеңестер алып, жақпамай жағып, өздері амалдауда.

Тұйық желілері бар әрі жолаушылар пойыздары да аялдайтын станцияның жұмысы енді қызады. Себебі, іргедегі орын тепкен Қаражыра көмір кенішінің маусымдық жұмысы басталмақ.

Бұл кезеңде станциядан бір ауысымда 19 жұп жүк тиелген жылжымалы құрам өтеді екен. Ендеше, желі бойындағы мал мен масадан қорғанудың маңыздылығы тіптен арта түседі деген сөз.