Сексеуілдіктер алғыс айтады
«Қазақстан теміржолшысы» газетінің тілшісі
Сексеуіл станциясында сан жылдан бері теміржолдың бір жақ бетінде тұратын мектеп оқушылары келесі бетіндегі оқу орындарына темір жол арқылы өтіп баратын. Осы кенттегі 360 бала күн сайын мектепке бару үшін 14 жолдан тұратын станцияның қауіпті теміржол аймағын кесіп өтуге мәжбүр болды.
Мәселе жергілікті және республикалық баспасөзде талай көтерілді. Жақында «Егемен Қазақстан» газетінде жарияланған «Темір жолды жағалап топ бала жүр» деген мақала Қазақстан Президентінің назарын аударып, Мемлекет басшысы бұл туралы ойын өзінің Твиттер парақшасында бөлісіп, Қ. Тоқаев өзекті мәселені шешуді Үкіметке тапсырған. Міне, сексеуілдіктер қазіргі таңда кенттің осы үш жүзден астам бала тұратын бөлігінде жаңа мектеп құрылысы басталды деген сүйінші хабармен бөлісті.
– Ел ертеңі – балалардың қауіпсіздігі мен өміріне қатысты өткір мәселе Мемлекет басшысы Қасым-Жомарт Кемелұлының тікелей араласуымен шешімін тапты. Енді бұл оқушылар да, келесі жылдары мектеп жасына жететін өзге балалар да мектепке бару үшін темір жолды кесіп өтпейтін болды. Халықтың өзекті мәселесіне құлақ түріп, шешімін табуға ықпал еткен Президентімізге бүкіл Сексеуіл халқы алғысын білдіреді. Өзім теміржолшы болғандықтан аса қауіпті аймақ саналатын теміржолдан бала түгілі ересек адамның өтуіне біз алаңдап отырамыз, – дейді Сексеуіл локомотив пайдалану депосы бастығының орынбасары Еркебұлан Аяғанов.