Сай-Өтес станциясында көпір салынады

Маңғыстау облысының Сай-Өтес станциясында теміржол үстімен жаяу жүргінші көпірі салынбақ. Қажетті қаражаты қарастырылып, теміржолдағы қауіпсіздікті сақтау бағытында теміржолшыларды толғандыратын мәселенің бірі биыл оң шешімін тапқалы отыр.

Көпір жобасы дайын. Мемлекеттік тапсырыс беріліп, мердігер мекемесі анықталған. Құрылысын «Ақжол құрылыс» жауапкершілігі шектеулі серіктестігі жүргізеді. Жобаның құны – 56 952 000 теңге. Аталған құрылыс осындай кезеңде жұмыссыз қалған азаматтардың жұмыспен қамтылуына да септік етпек. Осы арқылы 14 адамның жұмысқа тартылуы көзделген. Көпірдің іргетасын қалау осы айға жоспарланған.

− Жоба бойынша теміржол үстімен жаяу жүргінші көпірінің жалпы ұзындығы – 54 метр, биіктігі – 8 метр. Оның 6 метрі жердің үстіңгі қабатында тұрса, қалған 2 метр – жерге қағылатын бөлігі. Көпір Сай-Өтес ауылы орталығы мен Толыбай шағын ауданының арасын қосатын болады. Сай-Өтестің теміржолдың арғы жағында жаңадан бой көтеріп жатқан үйлер мен екі аралықтағы халықтың теміржол үстімен алаңсыз қатынауына мүмкіндік туады. Құрылыстың тендерін «Ақжол Құрылыс» серіктестігі жеңіп алды. Қазіргі таңда құрылыстың рұқсаты алынып, жұмыстарын бастауға құжаттары дайын тұр. Құрылыс 6 ай көлемінде жүргізіледі, – дейді бұл жөнінде Маңғыстау ауданы әкімдігінің өкілі Адайбек Қалиев.

Аталған жаңалыққа тек теміржолшылар ғана емес, теміржолмен екі ауылға ары-бері қатынайтын тұрғындар да, халқының қауіпсіздігі үшін ауыл басшылығы да қуанышты.

Елдімекендер арасы қауіпсіз жолмен жалғанса, адам өміріне қауіп төніп, теміржол қозғалысына кедергі келмейтініне, әсіресе, станция маңында қарауыл болудан шаршаған теміржолшылар риза. Сай-Өтес станциясында көпір құрылысы ауылда бұған дейін қордаланып келе жатқан мәселенің бірі екен. Түйіні енді осы жылы тарқатылайын деп тұр.

Орайы келгенде еске сала кетейік, теміржолдағы көпір тақырыбын осыған дейін де жазған болатынбыз. Яғни, Маңғыстау жол дистанциясының жетекші инженері Мұхтар Құлшанбаевтың сөзіне сүйеніп Шетпе станциясы мен №14 бекет аралығы 314 шақырымдағы күзетпелі өткелге көлік жүретін көпір салуға ЖСҚ жасақталып, Маңғыстау-Бекет «Р» аралығындағы 2-шақырымдағы өткелге де сондай көпір салу жайы қарастырылуда екенін айтқан едік.

Сонымен түбек теміржолында бүгінде халыққа қызмет көрсетіп тұрған автомобильдерге арналған екі, жаяу жүргіншілер жүретін екі көпір бар. Сай-Өтестен бой көтеретін жаңа нысан түбек теміржолындағы жаяу жолаушыларға салынатын үшінші көпір болмақ. Бұған дейін тек Шетпе және Өзен станцияларында болатын.