Тікелей эфирде - вокзал басшысы

Аудандық өңірлік коммуникациялар орталығы арқылы Шалқар станциясы вокзалының басшысы онлайн брифинг берді. Қызғалдақ Омарова тікелей эфир арқылы түсіндіру жұмыстарын жүргізіп, тұрғындар сауалына жауап берді.

Шалқар ауданы әкімдігінің Instagram желісіндегі ресми shalkar_ akimat парақшасы арқылы вокзал басшысы тұрғындарды сақтық шараларын сақтауға шақырды.

Басшы вокзалда бүгінгі күні жасалып жатқан жұмыстар туралы да мәлімет беріп кетті.

Қазіргі күні станция арқылы тек төрт пойыз ғана жүріп жатыр. Аймақта «Шалқар-Ақтөбе», «Ақтөбе-Алматы», «Ақтөбе-Алматы», «Орал-Алматы» жолаушылар пойыздарының ғана қатынасы тоқтаған жоқ. Ал «Алматы-Маңғыстау», «Маңғыстау-Алматы», «Атырау-Алматы», «Алматы-Атырау» жолаушы пойыздары және қалааралық «Шалқар-Сексеуіл», «Сексеуіл-Шалқар», «Шалқар-Жем», «ЖемШалқар» бағытындағы пойыздар уақытша тоқтатылған.

«Өздеріңізге белгілі, қазіргі таңда елімізде «COVID-19» инфекциясына қарсы жаппай қатаң күрес жүріп жатыр. Осыған байланысты қауіпсіздік аса маңызды. Қызметкерлердің барлығы қорғаныш құралдарымен қамтамасыз етілген. Жолаушылардан да бетпердемен жүру талап етіледі. Елімізде жарияланған төтенше жағдай кезінде ғана вокзалға шығарып салушылардың кіруіне тыйым салынды. Қазіргі уақытта вокзалдың барлық есіктері ашық, бірақ сақтық шараларын қатаң сақтау әр азаматтың борышы болу керек», – деді Қызғалдақ Омарова.

Тұрғындар тікелей эфирде пойыз қозғалысына қатысты сұрақтарды көп қойды. Сонымен қатар, пойызға кірген жолаушылардың дене қызуы өлшеніп, санитарлық талаптардың қатаң сақталатыны айтылды.

«Қазіргі жағдайға түсіністікпен қараған абзал. Әр адам барынша сақтанып, бетперде киіп жүргенде ғана уақытша дүрбелең басылады. Жақынымызға жанашыр болып, мүмкіндігінше үйден шықпаған дұрыс. Ал пойыздың жүру кестесіне қатысты ақпаратты «105» және «61-2-83» телефон нөмірлері арқылы алыңыздар», – деді вокзал басшысы.