Маңғыстау жоспарлы жөндеуден өтуде

Қазір Маңғыстауда қолданыстағы тепловоздардың дені 2ТЭ10МК сериялы ескі тепловоздар. 2002-2004 жылдары бұл локомотивтер америкалық Дженерал Электрик компаниясының электрқозғалтқыштары мен аппаратураларымен модернизациядан өткен. Сондықтан оның қосалқы бөлшектеріне тапшылық бар.

Бірақ соған қарамастан, жөнделмей, жүрмей қалып жатқан тепловоз жоқ. «Ат тапқанша тай міне тұр!» дегендей, жөндеу деполарының тапқырлығымен «америкалық» болмаса да қажетті қосалқы бөлшектер салынып, жұмыс жалғасуда.

− Бүгінде локомотив деполарында тепловоздарға қосалқы бөлшектердің уақытылы келмеуі проблема болып тұр. Аталған жағдай Қазақстанның барлық деполарында өзекті мәселенің бірі деуге болады. Себебі қазір біз қолданып жүрген 40 тепловоз осы 2ТЭ10МК сериялы тепловоздар болғандықтан қосалқы бөлшектері де сол жақтан алынады. Оның жеткізілуіне ұзақ уақыт кетеді. Дегенмен оны күтіп, жұмысты тоқтатып қойғанымыз жоқ. Жоқтан бар жасап, істен шыққан қосалқы бөлшектерді бірінен біріне салып, жамап-жасқап, тығырықтан шығып жатырмыз. Тежегіш жүйесінің бөлшектері, машинистерге қажетті шынтақ қойғыштар, орындық, маңдайалды терезе тазалағыштар сияқтылардың жарасы жеңіл, өзіміз жасап жатырмыз,– деген Маңғыстау локомотив депосының жөндеуді бақылау бөлімі бастығы Сәбит Зияев тепловоздардың негізі көп істен шығатын бөлшектері тартым электр қозғалтқышы, моторлы біліктік мойынтіректер екенін айтады.

Жөндеуді бақылау бөлімінің күшімен өткен жарты жыл ішінде CO-1 жөндеуін 43, CO-2 жөндеуін 48, CO-3 жөндеуін 29, CO-4 жөндеуін 6, CO-5 жөндеуін 7 тепловозға жүргізген. Бұл жерде CO-1-де ең төменгі жөндеу, яғни май, су құю секілді, жеңіл желпі техникалық шаруалар болса, әрі қарай жоғарылаған сайын жұмыс та күрделене түседі.

− Қазіргі пандемия, карантин жағдайына байланысты жөндеуді бақылау бөлімінің инженер-технологтары қашықтан жұмыс істеуде. Жұмыс барысы қашықтан басқарылуына қарамастан алға қойылған жоспарлар орындалуда. Тепловоздарға жүргізілуі керек жөндеу түрлері бойынша барлық жұмыс атқарылып жатыр. Бір ғана маусым айында CO-1 жөндеуі 12, CO-2 жөндеуі 8, CO-3 жөндеуі 5, CO-4 жөндеуі 2 тепловозға жүргізілді. Бұл жерде айта кететін нәрсе, тепловоздың жүрісі 21600 шақырымнан асқасын жөндеу түрлері бойынша ағытылады. Бүгінде депода барлығы 55 тепловоз бар. Сол тепловоздардың дер кезде жөнделіп, жұмысқа сай тұруы біздің мойнымызда. Қазір бөлімде жетекші инженер, бірінші санатты инженер технолог, инженер технолог, техник есепші бар менімен 5 адам жұмыс істеудеміз, – дейді Сәбит Зияев.