Өрт сөндіруге қатысты
Ақтөбе облысы бойынша меншікті тілші
Ақтөбе қаласының теміржол аймағында орналасқан 8 пәтерлі үйден шыққан жалын өрт сөндіру пойызының көмегімен ауыздықталды. Өрт сөндіру жұмысына төтенше жағдай қызметі мен теміржолшылардан құралған алпыстан аса маман жұмылдырылды.
Оқиға 2 тамыз күні таңғы сағат 09:53 минутта тіркелді. Локомотив көшесіндегі барақ үй теміржол бойына жақын орналасқан. Сондықтан теміржолшылар құтқару жұмысына ойланбастан кірісіп кетті. Төтесінен келген тілсіз жау екі сағаттан кейін ғана сап тыйылды.
«Локомотив көшесі 12А үйде тіркелген өртке қатысты қалалық төтенше жағдай қызметінің басшылары көмек сұрады. Өрт сөндіру пойызы бірден іске қосылды. Теміржолмен өрт болған жердің арасы – 500 метр. Біз бес АЦ-40 автомашинасын сумен қамтамасыз еттік. Өрт тез ауыздықталды, жану аумағы 400 шаршы метрді құрады, абырой болғанда, адам шығыны жоқ», – дейді Ақтөбе мемлекеттік емес өртке қарсы қызметінің бастығы Әділ Құбаев.
Қалалық төтенше жағдай департаментінің басшылары тілсіз жауды ауыздықтауға күш біріктірген теміржолшыларға алғыс білдірді. Өрт сөндіру пойызынан бөлек, 20 техника қызыл жалынмен күресті.