Түбек теміржолында бірнеше адам зейнеткерлік демалысына шықты
Маңғыстау облысы бойынша меншікті тілші
«ҚТЖ» ҰК» АҚ-ның ерте зейнетке шығару қағидасы бойынша түбек теміржолында бірнеше адам зейнеткерлік демалысына шықты. Оларды Маңғыстау жүк тасымалы бөлімшесінің басшылығы сыйқұрметпен шығарып салды.
Зейнетке шығып отырған ардагерлерді Маңғыстау жүк тасымалы бөлімшесінің директоры Нәжімеден Ғұбашов, бөлімшенің кадр бөлімі бастығы Екпін Қожахметов, Маңғыстау теміржолы кәсіподағының төрағасы Әзірбай Тұрмағамбетовтер құттықтап, жылы лебіздерін білдірді. Өңір теміржолының өркендеуіне қосқан үлестерін тілге тиек етіп, Алғыс хаттармен марапаттады. Қазақи дәстүр бойынша иықтарына шапан жауып, естелік сыйлықтарын табыс етті. Сондай ақ, биыл 80 жасқа толған өңір теміржолының ардақты ардагері, Құрметті теміржолшы, Маңғыстау теміржолы ардагерлері ұйымының төрағасы Амандық Алдабергеновті мерейтойымен құттықтады. Ардагерге игі тілектерін білдіріп, шапан кигізді.
− Біз бүгін түбек теміржолының өркендеуіне өмірін арнап, талай жылдардан бері аянбай тер төгіп келе жатқан төрт адамды зейнеткерлік демалысқа шығарып салдық. Олар – бөлімшенің шұғыл бөлімінде бас инженер Марат Ағатаев, жылжымалы құрамды пайдалану бөлімінің инженері Мақсат Исқалиев және шаруашылық бөлімінен жүргізуші Есен Сақтағанов пен ағаш шебері Жақсылық Мұханов. Бұл кісілердің әрқайсысының түбек теміржолына қосқан өзіндік үлесі ұшан-теңіз. Сондықтан олардың еңбектеріне айтарымыз тек қана алғыс, оларға мың тағзым, – дейді Маңғыстау жүк тасымалы бөлімшесінің кадр бөлімі бастығы Екпін Қожахметов. Зейнеттік демалысқа кеткен сол теміржолшылардың біреуі – Бейнеу локомотив депосының алғашқы іргетасын қаласқан Марат Ағатаев. 1983 жылы Алматыдағы теміржол институтын бітіріп, өзі туған жер Бейнеудегі теміржолға инженер болып орналасқан оның Бейнеу айналым депосының қалыптасуына қосқан үлесі ұшан-теңіз екен.
− Бейнеу локомотив айналым депосының алғашқы кірпіштерін қаласып, техникалық бөлімін өзім құрғанмын. Инженерлік сызбасын өз қолыммен сызып шыққан едім. Сол депода 1988 жылға дейін жұмыс істедім. Кейін Маңғыстау локомотив депосына ауысып, шебер, аға шебер, тепловоздарды жөндеу бойынша депо бастығының орынбасары болдым. Маңғыстау жүк тасымалы филиалында арнайы бөлімді басқардым, 2016 жылдан зейнетке дейін шұғыл бөлімде жұмыс істедім. Қазір ұлым Нұрсұлтан Ағатаев Маңғыстау белгі беру және байланыс дистанциясында электромеханик болып еңбек етіп, біздің әулеттің еңбек жолын жалғауда. Барлық әріптестеріме еңбекте табыс тілеймін, – дейді М.Ағатаев.