Қауіп-қатер аз емес
Пойыздардың қозғалыс қауіпсіздігіне қауіп төндіретін иесіз малдың, бейсауыт жүрген адамның жолға шығып кетіп, машинистердің жедел тежегіш қолдануы азаймай тұр.
Қызылорда жол дистанциясының жолшылары жыл басынан бері қауіпсіздік шараларын қатаң ұстанып келсе де түрлі себептердің салдарынан телімнен өткен жылжымалы құрам машинистерінің 8 мәрте жедел тежегіш қолдануы тіркеліпті.
Бұл көрсеткіш өткен жылы 11 рет тіркеліп, сәйкес мерзіммен салыстырғанда 3 жағдайға азайған десек те, жолшыларды алаңдатып отыр. – Темір жол – қауіпті аймақ.
Ол жерде бей-берекет жүруге, жол бойын жағалай мал бағуға және рельс үстіне бөгде заттар қоюға мүлдем болмайды. Бұл маңнан өткенде балаларды қараусыз қалдыруға болмайды. Көктемгі-күзгі егін жұмыстары, сенбілік кезінде және ауа-райы температурасының жоғары жағдайында өрт қауіпсіздігі ережелері мен санитарлық-экологиялық норма талаптарын қатаң сақтау екендігін жергілікті тұрғындарға әр кездескен сайын қайталап айтудан жалықпаймыз, бірақ бірі құлақ асса, бірі құлақ аспайды, дегенмен біздің міндетіміз – қауіпсіздіктің сақтауына қатысты күресті тоқтатпаймыз, – дейді Қызылорда жол дистанциясы техникалық бөлім инженері Ахметқали Елеусінов.
Дистанцияда иесіз малдың жолға шығып кетпеуі үшін малға қарсы сым қоршауларға күнделікті жөндеу жұмыстары тұрақты жүргізілуде.
Жергілікті әкімшілікпен, ЖІІБ өкілдерімен бірлесіп рейд, насихат жұмыстары қолға алынған. Мәселен, ЖІІ бөлімінің полиция өкілдерімен бірлесіп жыл басынан бері 67 рет рейд ұйымдастырылып, жергілікті тұрғындарға теміржолдың аса қауіпті аймақ екендігін түсіндіру жұмыстары жасалыпты.
Сонымен қатар 17 күзетпелі теміржол өткелінде де 197 рет рейдтік тексеру жүргізіп, 4240 автокөлік иелеріне жол жүру, өтпеден өту ережелерімен таныстырған.