Жеті айдың жетістігі аз емес
«Қазақстан теміржолшысы» газетінің тілшісі
Ақмола жүк тасымалы бөлімшесі ағымдағы жылдың жеті айында кейбір көрсеткіштерді межесінен асыра орындаса, енді бірқатарында белгілі себептерге байланысты жоспарды толық орындай алмады.
Десек те, жеті айдың жетістігі аз емес. Мәселен, жүк айналымы жоспары 101,5% орындалып, өткен жыл межесінен 3,1% артық шықты.
Бөлімше мамандары жеті айда түйіспе пункттерден тәулігіне орташа есеппен 5935 вагон қабылданып, жоспардың асыра орындалғанын айтып отыр. Бұл көрсеткіш өткен жылдың есепті мерзімімен салыстырғанда, түйіспе пункттерден жалпы қабылданған вагондардың 237 вагонға немесе 4,2% артқанын көрсетіп отыр.
Бірақ, жүк вагонының динамикалық жүктемесінде жоспардың азкем, яғни 0,1% орындалмағаны байқалады. Оған тәулігіне орташа есеппен алғанда жүк тиелген вагондар санының 26 бірлікке дейін қысқарып кетуі себеп болған. Десе де, жеті айлық меженің үдесінен табылмағанына қарамастан, бұл көрсеткіштің былтырғы жылдың жүк вагонының динамикалық жүктемесінен орташа тәулікте 0,15 тоннаға ұлғайғаны байқалады.
Ал жүк тиеліміне келсек, биылғы қаңтар-шілде аралығында жоспардан тыс 119 600 тонна жүктің артылып тиелгеніне қарамастан, бұл көрсеткіш өткен жылдың жеті айлық межесінен 500 300 тонна жүкке кем болып отыр. Оның бірнеше себебі бар.
Біріншіден, 2019 жылы егіннің бітік болмауы, яғни құрғақшылық, кейін тоқтаусыз жауын-шашынның болуы болса, АҚШ-тың Орталық Азияның негізгі тұтынушы елдеріне қарсы санкциялары, үшіншіден, Өзбекстан аумағындағы (Өзбекстанда астық тартатын кәсіпорындардың пайда болуына байланысты) транзит пен кіріп шығуға кедендік салымның өсуі салдарынан туындаған қымбатшылық есебінен Орталық Азия елдерінде астық өнімдерін тұтынуға сұраныстың төмендеуі, COVID-19 пандемиясымен күрес салдары кері әсерін тигізген.
Жүк түсіру жұмысына келсек, бұл бағыттағы жоспар 94,6% орындалған. Жүк түсірілімінің төмендеуіне осы жылдың қаңтарақпан айларында ауа-райының қолайсыздығы, одан кейін наурыз айында коронавирус пандемиясымен күресуге байланысты елімізде төтенше жағдайдың жарияланып, соның салдарынан негізгі өндірушілердің толықтай немесе жартылай қызметтерін тоқтатуы себеп болған.
Жеті айлық жұмыс қорытындысы бойынша жүк вагоны айналымы, бос вагондардың жүк тиелген вагондарға шаққандағы жүріс проценті, жүк вагонының ортатәуліктік өнімділігі сынды көрсеткіштер көңілден шықпаса, жергілікті вагон айналымы, локомотивтің орта тәуліктегі жүрісінің орындалуы, вагондардың жалпы жұмыс паркінің күтімі, бір жүк операциясы кезінде вагондардың тоқтап тұруы, телімдік және техникалық жылдамдық, локомотивтің ортатәуліктік жүрісі сияқты межелі жұмыстар жоспардан асыра орындалған.