Байланыстың бабын жасап

Қызылорда белгі беру және байланыс дистанциясының Белкөл станциясындағы өндірістік қосынының теміржолшылары жылжымалы құрамдардың қозғалыс қауіпсіздігін сақтауға өз үлестерін қосып отырғандарына сенімді.

Олар дистанция басшысы Әкімжан Қосанов бекіткен жоспарлы жүктемелерін орындай жүріп күнделікті атқаратын өндірістік жұмыстары барысында байланыс құрылғыларының жұмыстан тыс қалмауына мән беріп, олардың технологиялық талапқа сай ағымдық жөндеу, бабына келтіріп баптау, күтім жасалуына да айрықша назар аударады. Байланыс құрылғыларының дистанция телімдеріне орналастырылуы қатаң технологиялық тәртіптегі жүйемен жүргізілгендіктен олардың жөндеу жұмыстары кезіндегі жайы, ағымдық күтім барысындағы жағдайы да сол әуел бастағы формада болуы тиіс.

Өзгеріс енгізілген жағдайда арнайы жорналда тіркеледі. Негізінен о бастағы қалып негізінде сақталуы ерекше мәнге ие.

Себебі күтім не тексеріс кезінде технологиялық сызбаға сүйеніп жасалынатын сервистік жұмыстар құрылғылардың ақаусыз жұмыс жасауына негіз болып саналады. Сондықтан олардың әуелгі қалпында тұруы маңызды, соған орай оларға көрсетілетін күтім сапасы да түрленуі мүмкін, мәселен, бір тізбекке жөндеу қажет болса, келесісі ағымдық күтім уақытына қарай көзден өткізілсе, енді біріне бақылап тексеру жұмыстарын жасау мерзімі келгендіктен соған сәйкес жұмыстар атқарылады. Ең бастысы, кез келген сәтте байланыс бабында болу керек. 

Белкөл станциясына келгенімізде қосын басшысы Еркін Оңалов КИП электромеханигі Қуаныш Жоламановпен бірге құрылғылардың жиынтық сызба тізбегін тексеріп бақылау жасауда екен. Бұл жерде рельс тізбектері жүйесінің, бағдаршамдардың және сигналды релелердің жиынтық жүйесі орналастырылған. Арнайы тексеру құрылғыларымен жүйенің өн бойындағы және бекітпе нүктелерін бақылап жатқан мамандар жұмыстарының басты мақсаты пойыздардың қозғалыс қауіпсіздігін сақтауға негізделгенін, соған орай құрылғылар желісінің тексеруден өткізілуде екенін түсіндірді.

– Бұл жерде станциядағы және осы телімдегі байланыс құрылғыларының бәрінің жұмысы сызба негізінде бекітілген. Оларға техникалық қызмет жасап, ұдайы тексеруден өткізу – басты мақсатымыз. Мәселен, бекеттің басты жолдарындағы шығыс сигналдары, бағдаршамдар – қозғалысты ұйымдастырудағы негізгі құрал. Ал бағдаршам жарығы жылжымалы құрамдардың жүріс бағытын үйлестірудегі негізгі құрал саналады. Технологиялық талап бойынша бағдаршам жарығының түсі бір құрамға 3-6 секунд аралығында жанып тұруы шарт, егер белгіленген мөлшерден аз жанса пойыздардың қозғалысына кедергі келтіруі ықтимал. Осындай болуы мүмкін ықтималдылықтарды болдырмас үшін дәл қазір біздер сигналды релелердің баяулатқышын тексеруден өткізудеміз, – деді қолындағы құралдарымен әр тетікті мұқият бақылап жүрген КИП маманы Қуаныш Жоламанов.