Қазалы транзиттік станциясында жұмыс қызған

Екінші класты Қазалы транзиттік станциясы – Қызылорда бөлімшесіндегі маңызды бекеттің бірі. Станциялықтар ағымдағы жылдың басынан бері өздеріне жүктелген тапсырмаларды мінсіз орындап, пойыздық және маневрлік жұмыстар кезінде пойыздардың қозғалыс қауіпсіздігін толық сақтай білді. Өндірістік көрсеткіштер де межеден асыра орындалып отыр.   

Станциялық және кірме жолдарда оқыс жағдай орын алмаған, вагон паркі түгел. Өткен жылы да, биыл да қауіпсіздік және еңбек қорғау талаптары орындалып, өндірістік жарақат алу жайы тіркелмеген.

Станция тынысы мен атқарылған жұмыстар жайлы мәлімет ұсынған станция бастығының оперативті жұмыстар жөніндегі орынбасары Руслан Мақашовтың айтуынша, қазалылықтар жыл басынан бері 297 вагонға 15242 тонна жүк тиеген. Осы аралықта 2325 вагоннан жүк түсіру нормасын 2799 вагонға жеткізіп, жоспарды 120,3 пайызға асыра орындапты. Қысқасы, барлық көрсеткіштер жоспарға сай, ең кемі 103,1 және 124,1 пайыз аралығында орындалғаны әлеуеті жоғары бекеттің еңбекқор ұжымының тиімді жұмыс істеп отырғанын дәлелдейді.

Бекетке келген жүк пойыздарын сараптап, қайта құрастыру да ойдағыдай. Жыл басынан бері 56 пойыздың 26606 вагонын ағытып, бөлшектеп, 27592 вагонды 384 пойызға жинақтап, құрастырып жөнелткен. Оған қазалылық теміржолшылардың кірме жолдарға вагондарды беру, оны кері алу, құраманы қайта тіркеу, бір жүк операциясы кезіндегі вагонның тұруы немесе вагонның жүк операциясы жасалмай бос тұруы секілді жұмыстардың жиынтық көрсеткіштерін қоссақ, станциялықтардың бір тәуліктегі атқарған жұмысының нәтижесі қомақты екенін байқаймыз.

– Екінші класты транзитті станция саналатын Қазалы бекетінде тақ және жұп екі парк бар. Жүк тиеу-түсіру, маневрлік пойыздық жұмыстар осында атқарылады. Үш жол жолаушылар пойызын қабылдап-жөнелтуге арналған. Пойыздардың бекет жолына кесте бойынша қабылданып жөнелтілуінде әзірге кедергі болған емес. Күнделікті жөнелтілетін пойыздардан бөлек қазіргі таңда контейнерлік пойыздар қозғалысына аса мән беріліп отыр, тәулігіне 7-8 контейнер пойыз өткізілуде. Ұжым өз ісінің мамандары саналатын тәжірибелі теміржолшылардан құралған. Станция кезекшілері Өмірбай Қарабеков, Бақытбек Қараев пен Манас Ізтілеу, станция кезекшісі жанындағы оператор Асылзат Каденова мен Гүлнұр Сисенова, пойыз құрастырушылар Нұрғазы Өтекеш, Мейрамбек Құлмұратов – осы ұжымда бір емес, бірнеше онжылдық еңбек етіп келе жатқан тәжірибелі теміржолшылар, – дейді бекет бастығының орынбасары Руслан Мақашов.

Станцияда қазіргі эпидемиялық ахуалға байланысты жұмыстардың басым бөлігі техникалық сабақ, инструктаж секілді білім жетілдіру жұмыстары электронды жүйемен қашықтықтан жүргізілуде.