4 бірдей жолсерік әкімшілік жауапкершілікке тартылды
«Қазақстан теміржолшысы» газетінің тілшісі
Қатаң тәртіпті талап ететін темір жол саласында өзгелерге үлгі болмақ түгілі өздері заң бұзатындар да кездеседі. Жақында қоғамдық орынды ластаған 4 бірдей жолсерік әкімшілік жауапкершілікке тартылды.
Биыл 23 шілде мен 30 тамыз аралығында желілік тәртіп сақшылары «Таза Қазақстан» экологиялық акциясын өткізіп, соның аясында жолсеріктердің жөнсіз әрекетін анықтады. Атап айтқанда, Достық станциясында өткен осы жедел профилактикалық іс-шара аясында «Достық-Нұр-Сұлтан» бағытындағы жолаушылар пойызының жолсеріктері ӘҚБтК-нің 434-бабы 2-бөлігі, яғни ортақ пайдаланылатын орындарды ластау фактісімен әкімшілік жауапқа тартылды. Негізі бұл акцияның мақсаты – азаматтарды қоғамдық ортаны таза сақтауға шақыра отырып, экологиялық құқықбұзушылықтарды анықтау және оның алдын алу еді. Алайда қарапайым азаматтардан бұрын пойыздағы жолаушыларға жөн көрсететін жолсеріктер вагоннан шыққан коммуналдық қалдықтарды Достық станциясындағы темір жол вокзалының маңайына тастап, қоғамдық орынды ластаған. Осы әрекеттері үшін жолсеріктерге 5 АЕК мөлшерінде әкімшілік айыппұл салынды. Тексеру барысында бұл жолсеріктердің Нұр-Сұлтан қаласының 1968, 1971,1976, 1990 жылғы тұрғындары екені анықталды.
Жалпы ҚР ІІМ Көліктегі полиция департаменті және оның желілік бөліністерінің қызмет көрсету аумағында жыл басынан бері 27 506 әкімшілік құқықбұзушылық тіркелген. Оның ішінде ортақ пайдаланылатын орындарды ластаудың 556 фактісі болған.