Көктемгі кемшілік күзде қайталанбайды

Атырау жүк тасымалы бөлімшесінде 16 қыркүйектен күзгі комиссиялық тексеру жұмыстары басталды. Тексеріс барысында қозғалыс қауіпсіздігі, еңбек қорғау және қауіпсіздік техникасы, техникалық құралдардың, ғимараттардың жай-күйі, байла- ныс, электр құралдарының жағдайы, вагондардың жайы, темір жолдың қазіргі күйі, сондай-ақ теміржолшылардың білім мен біліктілігі, жеке мәселелері, проблемалары да қаралады. 

«Комиссия мамандарымен қамтылған тексеріс арнайы локомотив арқылы жүзеге асырылмақ. Ең әуелі Атырау және Теңдік станцияларынан басталып, Ганюшкино-Д.Нұрпейсова телімі бойынша жүргізіледі. Ганюшкино-Исатай, Исатай-Қызылжар телімдері, содан кейін Махамбет, Атырау, Теңдік, Ақжайық, 496-402 разъезд аралығы, Сағыз-Мақат, Мақат-Құлсары телімдері, телімдердегі жол, сигнализация, энергиямен қамту дистанциялары, вагон, локомотив деполары, т.б. қаралады. Сол жерлерде талқылау жұмыстары да жүргізіледі», – дейді Атырау жүк тасымалы бөлімшесі бас инженері Бауыржан Картан. 

Биылғы көктемде елдегі карантинге байланысты көктемгі комиссиялық тексеру мекемелердің өз күштерімен, әр құрылым басшылығының басқаруымен өз ішінде өткен болатын. 

Енді жылдағыдай арнайы комиссия шығарылып отыр. Жалпы, биылғы жылдың сегіз айында пойыз және маневрлік жұмыстарда өңірде өндірістік жарақат алу болған жоқ. Бөлімшеде пайдаланым көрсеткіштерін орындау бойынша нәтижелер жақсы деңгейде келе жатыр. 

Көктемгі тексеріс кезінде станциялардың техникалық жағдайы, магистральдық инфрақұрылым мен жасанды құрылғылардың жағдайы, су мен жылу нысандары, өрт қауіпсіздігін сақтау ережелері, орталықтың бұйрықтары мен басқа да нұсқаулықтарын орындау тәртібі қаралған еді. Жалпы алғанда, қозғалыс қауіпсіздігі, еңбек қорғау және қауіпсіздік техникасы, техникалық құралдардың жағдайы, жұмысшылардың тәртібі қанағаттанарлық болды. Жолды және бағыттамалы бұрмаларды күтіп-ұстау бағытындағы кемшіліктер кесірінен пойыздар жүруге тыйым салу және маневрлік жұмыстар жасау үшін жолды жабу мен жылдамдықты шектеу оқиғалары орын алған. Сигнализация және байланыс дистанциялары бойынша электр желілерін, бағыттамалы бұрмаларды сыртқы тексеруді, рельс шынжырларының оқшаулау элементтерін тексеруді сапасыз жүргізу және жөндеу бағытындағы кемшіліктер бар. Электрмен жабдықтау дистанцияларында жарықтандыру мәселесі төмендігі белгілі болды. Вагон қараушылар тарапынан вагондарға техникалық қызмет көрсетуде ақауды анықтау мен түзету дұрыс орындалмайды, станцияларда вагондарды қайта бақылау-тексеру кезінде кемшіліктер анықталған. Қосалқы бөлшектер де жеткіліксіз, соның кесірінен ағымдағы жөндеу жасауға мүмкіндік жоқ. Жолаушы вагондарына қажетті қосалқы бөлшектер де жеткіліксіз жағдайда екені анықталған болатын. 

«Көктемгі тексеріс барысында болған станцияларға тән кемшіліктер – темір жол торабында болған келеңсіз жағдайлар тіркеле бермейді, станция қызметкерлері тарапынан нұсқаулықтар дұрыс жүргізілмесе, кейбірінде радиобайланыс жеткіліксіз болып қалады. Станцияларда кезекшілер жаңа нұсқаулықпен жұмыс жасауға біртіндеп көшуде, білім жетілдіру, жүк қабылдапжөнелту бойынша ескертпелер болды. Жол дистанциялары бойынша, кейбір учаскелерде, шпалдың және рельстің, бұрмалардың ақаулығынан жылдамдықты шектеуге тура келген. 

Локомотив бригадаларының бақылаунұсқау сапарлары, пойыз машинистерімен радиобайланыс дұрыс ұйымдастырылмаған жайттары да кездесті. Вокзалдар мен жүк тасымалы бөлімшесіне қарасты барлық разъезд ғимараттарын әктеп-сырлауға, айналаны таза ұстауға көңіл бөлу қажеттігі де ескертілді. Биыл осы олқылықтар жойылып, бәрі қалпына келеді деп ойлаймыз», – дейді Атырау жүк тасымалы бөлімшесінің бас инженері.