«Эко-сақшы» экологиялық акциясы өтті
Шымкент қаласы бойынша меншікті тілшісі
«ҚТЖ-ЖТ» АҚ – «Шымкент ЖТ бөлімшесі» филиалына қарасты Түркістан станциясында «Эко-сақшы» экологиялық акциясы талапқа сай өтті. Акция аясында станциядағы қоқыс қалдықтарын бөлек-бөлек етіп жинау және табиғи ресурс көздерін үнемдеу жүйесі қарастырылды.
Бесінші маусымнан басталған акция қыркүйек айының ортасына дейін жалғасты. Эко-сақшы айлығының мақсаты, аты айтып тұрғандай, қоршаған ортаны қорғау, ластайтын заттардан сақтап, қоқыс қалдықтарын тастамауға үндеу.
Эко-сақшы шарасының қалай өтетіні жайлы Түркістан станциясының әрбір жұмысшысына егжей-тегжей түсіндірілді. Айлық кезінде станцияның әрбір қызметкері экология ережесін бұзғандарды көріп қалса суретке түсіріп алып, фактілерді станцияның бас инженеріне табыс етуге міндеттелді. Сондай-ақ станцияның әрбір жұмысшысы шыны, пластик, қағаздарды бөлек тастайтын урна жәшігін де қадағалауға алды. Теміржолшылар жұмыс орнын таза ұстап, жақын маңдағы территорияларды ластамауды, өндірістік қалдықтардың көбеюіне жол бермеуге атсалысты. Экологиялық айлықтың нәтижесінде теміржолшылар станция жолдарын, горловина және де жұмыс орындарын ұқыпты әрі тиянақты ұстауға бейімделді.
Станцияның бас инженері Е.Исабеков экология мәдениетін тереңдете түсу үшін жұмысшыларға арналған эко-дәрістер ұйымдастырып, қалдықтарды түрлеріне қарай қоқыс жәшігіне сұрыптап салу туралы буклеттер мен үгіт-насихат материалдарын таратуды ұйымдастырды.