Диспетчерлер - қозғалыс дирижерлары
Қызылорда облысы бойынша меншікті тілші
Қазалы белгі беру және байланыс дистанциясының қызмет көрсету аумағы үш телімге: Қазалы-Жосалы аралығы, Қазалы-Сексеуіл және СексеуілҚоскөл аралығы болып бөлінген. Диспетчерлер 637 шақырымды құрайтын осы аралықта қозғалыс үдерісін басқарып отырады.
Қазіргі таңда дистанцияда байланыс құрылғылары заманауи түрге ауыстырылып жаңаруда. Соңғы уақытта дистанция бойынша 72 Альстом электрожетегі, микропроцессорлы МПЦ және диспетчерлік орталықта АСДЦ құрылғыларының орнатылуы теміржолшылардың жұмысын жеңілдетіп, жаңаша ұйымдастыруға мүмкіндік берген. Диспетчерлер қосынының басшысы аға диспетчер Эрик Есмаханов жағымды жаңалықтарымен бөлісіп, диспетчерлердің жұмыс орнындағы монитордан телімдердің бақылану сәтін көрсетті.
Диспетчерлердің басты мақсаты күнделікті межелі жұмыстардың технологиялық процестерге сай орындалуына жағдай жасап, бақылап отыру екені белгілі.
Бұл міндетті қазалылық «қозғалыс дирижерлары» мінсіз атқаруда. Толыбай Есқожаев, Қайрат Изенов, Қанапия Беклібаев, Жанкелді Еселбай және Нұрымбет Сердалиев секілді тәжірибелі диспетчерлер ең қиын телімдердің жұмысын реттеп отырады екен. Ауысыммен жұмыс жасайтын олардың әрқайсысы өз ісін жете меңгерген кәсіби мамандар болғасын жұмыстың ауыры да солардың иығына жүктелген.
Диспетчерлер телім бойындағы қозғалысқа кедергі келтірілмеу үшін, кемшіліктің алдын алу үшін бақылау да жүргізеді. Мәселен, жол бойында, яғни жаңағы аталған үш телімде кемшілік анықталған жағдайда ақаулы участок резервке алынып, қозғалысты жанама жолмен ұйымдастыруға көшіріледі. Кемшілік анықталған орынға тиісті мекемелердің өкілдері шақырылып, сараптама жүргізіледі, кемшілік электрмен жабдықтау, байланыс не жол шаруашылығы тарапынан болуы ықтимал болғандықтан ол мекемелердің өкілдерімен тексеру жасалып, олқылықты тез арада орнына келтіру жұмыстары ұйымдастырылады.
– Диспетчерлердің негізгі жұмысы – дистанция телімдерінде пойыздардың кестеге сай жүріп, қозғалыс қауіпсіздігін сақтауын бақылау. Күнделікті технологиялық процесті қадағалап, графикпен бекітілген жұмыстардың сапалы жасалуын қамтамасыз етіп ұйымдастырып, бақылап отырады, – дейді аға диспетчер Эрик Есмаханов.