Технологиялық нормаға сай

Қазалы белгі беру және байланыс дистанциясының теміржолшылары күзгі байқау аясында байланыс құрылғыларын ревизиядан өткізуде. Алдағы қатаң қыс мезгіліне дайындық жұмыстарын жасау барысында телімдердегі байланыс нысандарына ағымдық күтім жасау, тексеріп бақылау жұмыстарын күшейте түскен. 

Байланыс құрылғыларының кедергісіз жұмысы пойыздардың қауіпсіз қозғалысының кепілі саналатындықтан әр теміржолшы өздеріне бекітілген тапсырмаларды мінсіз атқарып, құрылғылардың монтаждалу құрылымын, герметикалық қорғаныс қабатының жағдайын, сызбасы бойынша орналасуы секілді ерекшеліктерін назарға алып, барлық параметрлері иненің көзінен өткізілгендей қырағылықпен тексеріліп, қажетті техникалық күтім жасап жатыр. 

Қазалылық байланысшылардың күзгі комиссиялық тексеруге әзірленіп, қыс маусымына құрылғыларды дайындау барысын көзбен көріп, көңілге түйдік. 

Электромеханиктер Мейрамбек Баукешов пен Сәкен Аңсатбаев мегометрдің көмегімен құрылғылардың техникалық ахуалын тексеруде. Дистанция мамандарының байланыс құрылғыларын тексеру, ағымдық күтім жасау жұмысын дистанцияның аға электромеханигі Досан Нұржаубаев сызба бойынша қарап, тағы да жіті бақылаудан өткізуде. 

– Қазалы белгі беру және байланыс дистанциясының телімдеріндегі және станциялық жолдарға орналастырылған байланыс құрылғыларының жай-күйін тексеріп, ревизия жасаудамыз. Мұнда жолдардың кішігірім сызбасы бедерленген десек болады, яғни бағдаршамдар, бағыттамалық бұрма, рельс тізбектері секілді құрылғылардың қалай, қай жерде орналасу жиынтық сызбасы түзілген. Байланыс құрылғыларының осы жиынтық сызба тізбегі бойынша орналасуын, жұмыс қабілетін, олардың жағдайын, желілердің оқшаулану дәрежесін мегометр құрылғысымен өлшеп тексеруден өткізудеміз, өзім сызба бойынша орналасуына мән беріп, бақылап отырмын. Әзірге желілердің оқшаулану сапасы жақсы, тосын жағдай немесе желінің босауы, ойнауы, үзілуі секілді олқылықтар кездескен жоқ, барлық желі технологиялық нормаға сай болып тұр. Жалпы жұмыс барысында салалық мекеме теміржолшылары тарапынан кемшілік байқалғаны жайлы ескертулер болған жағдайда тосын тексеру жүргізіледі. Ол кезде сызба бойынша желінің өн бойы бақыланып, толық тексеруден өткізіледі. Ақау не кемшілік табылса, сызбада көрсетілгендей етіліп желі жаңартылып, сызбаға өзгеріс енгізілгені жайлы жазу тіркеледі, – деді аға электромеханик Досан Нұржаубаев.