Атыраулық диспетчерлердің алғашқы легі келіп қоныстанды
Ақтөбе облысы бойынша меншікті тілші
«Қазақстан темір жолы» ҰК» АҚ – Магистральдық желі бөлімшесінің «Пойыздар қозғалысын басқару орталығы» трансформация жобасы аясында Ақтөбе өңіріне атыраулық диспетчерлердің алғашқы легі келіп қоныстанды.
Оларды Ақтөбе жүк және магистральдық желі бөлімше басшылары Бөріхан Беркімбаев пен Серғали Жайлаубай бастаған жергілікті теміржолшылар вокзалдан күтіп алды. Жаңа аймаққа отбасымен көшіп келіп жатқан теміржолшыларға қазақи дәстүрмен қымыз бен шұбат ұсынды.
«Сіздер үлкен тарихи жобаның алғашқы қарлығаштарысыздар. Көпшілігіңізбен таныспын, кезінде Атырау өңірінде бірге еңбек еттік. Ақтөбеге сіңісіп, Батыс аймақтың диспетчерлері бір үйдің баласындай ауызбіршілікте жұмыс жасайсыздар деп сенемін. Үлкен жауапкершілікті талап ететін жобада Сіздер көшбасшы болатындарыңызды мақтан етулеріңіз керек. Үлкен жоба үмітті ақтап, баршамызға абырой әкелсін», – деді Ақтөбе ЖТ бөлімшесінің басшысы Бөріхан Беркімбаев вокзал ғимаратында өткен басқосуда.
Магистральдық желі бөлімшесінің басшысы атыраулық диспетчерлерді орталық жұмысын жандандыруға күш салуға шақырды. «Әр аймақтың мықтылары бір орталыққа жиналып жатыр. Өздеріңізге қандай жауапкершілік жүктелгенін сезінесіздер. Енді сіздер ақтөбелік теміржолшысыздар.
Қадамдарыңызға нұр жаусын. Жұмысты жоғары деңгейде көрсете білейік. Сіздерге көмек көрсетуге біз дайынбыз. Орталық жұмысын жандандыруға атсалысуға шақырамын», – деді Серғали Жайлаубай.
Коныс аударушыларды орналастыру мәселесі қатаң қадағаланып, әр диспетчер толықтай орналасқанша отбасымен бір маманға бекітілген. Оларды пәтерге орналастыру, қажетті затымен қамтамасыз ету жұмыс жүйеленгенше жалғасады.
Ақтөбе, Атырау, Маңғыстау, Орал және Қызылорда бөлімшелерінің бес бірдей диспетчерлік орталығын біріктіретін пилоттық жоба – Қазақстан темір жолы қызметіндегі цифрлық технология көрінісі. Енді Батыс аймақтағы барлық қозғалыс Ақтөбеде орналасқан бір орталықта басқарылады. Қазіргі уақытта Ақтөбе және Орал өңірінің диспетчерлері жаңа ғимаратқа көшіріліп, жұмысты бастап кетті. Жобаны жүзеге асыру барысында өткен жылдың 23 желтоқсанынан бастап Орал қаласынан 13 диспетчер келген болатын. Бүгін кесте бойынша Атырау қаласынан алты диспетчер қоныс аударып отыр. Келесі аптада қалған 11 маман келеді деп күтілуде. Сонымен қатар алдағы уақытта 18 диспетчерді Маңғыстау өңірінен, 22 диспетчерді Қызылорда облысынан күтіп алу жоспарланған. 12 қарашаға дейін барлық маман көшіп болуға тиіс.
Батыс аймақтағы пойыздар қозғалысын басқаруды бір орталыққа жинаған пилоттық жоба тек Ақтөбе өңірінде ғана емес, болашақта Алматы және НұрСұлтан қаласынан ашу жоспарланған.