Күздегі күрделі жөндеудің 42% аяқталды
«Қазақстан теміржолшысы» газетінің тілшісі
Маңғыстаудағы Шетпе станциясы мен №13 бекет аралығында қыркүйек айының 19 күні басталған күрделі жөндеудің 42 пайызы аяқталды.
Мердігер компания – «Теміржол жөндеу» ЖШС-не қарасты «Ақтөбе» ПМС мекемесі күрделі жөндеуді жалғастыруда. Мекеме директорының орынбасары Данияр Майасаровтың айтуынша, бұл телім бойынша барлығы 13 км жолды күрделі жөндеу жоспарланған.
Қазір соның 6,200 шақырымы бойынша жұмыстар бітті.
– Аталған телімдегі шпал, рельс, жер төсемі, бәрін жаңартып жатырмыз. Ағаш шпалдарды 736 темір-бетон шпалмен ауыстырамыз. Қиыршық тас Біршоғырдан жеткізілуде. Материалдық базамыз Бейнеу станциясының басында тұр. Күнде түсте 12-00-ден кешкі 20.00-ге дейін 8 сағаттық толаскез кезінде жол жөндеуге кірісеміз.
Бұл – Маңғыстау ЖТ бөлімшесі басшыларының берген уақыты. Себебі осы аралықта аталған телімде пойыздар қатынасы сирек екен, – дейді мердігер мекеме өкілі.
Күзгі күрделі жөндеуді жүргізіп жатқан мердігер компанияның 120 адамы арнайы 7 вагонмен Шетпе станциясына келіп тоқтаған. Олар шамамен қазан айының 17-не таман күрделі жөндеу жұмыстарын аяқтамақ.
Жұмысшылары 20 күн сайын ауысып отырады. Жалпы «Ақтөбе» ПМС мекемесіне биылдыққа барлығы 56,400 км жолды күрделі жөндеу жүргізу жүктелген.
Ал жөнделген жолдардың сапасын Маңғыстау жол дистанциясы мен Магистральдық желі бөлімшелерінің басшылары қарап, қабылдап алуда. Олардың айтуынша, Нұр-Сұлтан, Алматы, Ақтөбе, Атырау, Бейнеу бағытындағы жолаушылар пойыздарының қозғалысы бекітілген кесте бойынша ұйымдастырылған.
Ақтау қаласына өте қажетті жүктер мен тауарлар, атап айтқанда азық-түлік, дәрі-дәрмек, құрылыс және жанармай материалдары уақытылы жеткізіліп тұр.