«Үздік рационализатор» байқауының жеңімпаздары анықталды

Шымкент жүк тасымалы бөлімшесінде «Үздік рационализатор» байқауының осы жылдың үшінші тоқсанына арналған қорытындысы шықты. Бірінші деңгейдегі бұл байқауға рационализаторлық ұсыныс жасаған сегіз үміткер қатысты. 

Байқау комиссиясын Шымкент жүк тасымалы бөлімшесінің бас инженері Ильяс Нұржанов басқарды. Құрамында техникалық бөлімнің бастығы Н.Есенбаев, филиалдың экономикалық жоспарлау бөлімінің бастығы М.Шахаев, техникалық бөлімнің өндірістік оқытудан инструкторы Ғ.Мұратбаев болды. 

Айта кетейік, байқауға ұсынылған барлық рационализаторлық ұсыныстар пойыздар қозғалысының қауіпсіздік деңгейін жоғарылатуға, құрылғылардың беріктігіне, филиалдың технологиялық жұмыстарын жақсартуға, сондай-ақ тауар-материалдық ресурстарды үнемдеуге бағытталған. 

1-ші деңгейдегі техникалық кеңес рационализаторлық ұсыныстардың бәрін қарап шығып, жүлделі орындарды анықтады.

Вагон қараушы-жөндеуші И.Алтаевтың «Өлшеу құралдарымен тексеру бойынша жұмыс технологиясы (автосцепканың жағдайы мен қозғалысын тексеретін комбинациялық шаблон) Арыс станциясы ВЧД-30 зертханасы» атты ұсынысы жоғары бағаланып, бірінші орынды иемденді. Екінші орынды Шымкент станциясының жетекші инженер-технологы А.Әбішев алса, үшінші орынды өндірістік-техникалық бөлімнің бастығы Т.Ордабай иеленді. 

Шымкент жүк тасымалы бөлімшесін алға сүйрейтін ұтымды ұсыныстары үшін байқауға қатысқандар марапатталды. Бірінші орынға 40 мың теңге, екінші орын иесіне 30 мың теңге, үшінші орын иесіне 20 мың теңгеден ақшалай сыйлық берілді. 

Сонымен комиссия аталған үш рационализаторлық ұсынысты 2-ші деңгейде өтетін техникалық кеңеске жолдады.