Тілсіз жаудан дін аман

Маңғыстау теміржолында биылғы жылы бірде-бір өрт оқиғасы болған жоқ. Барлық нысан «тілсіз жаудан» дін аман, өрттен қорғаныста қажет шаралар қолданылуда. Бұл жыл сайын үлгілі қызметімен бәйгенің алдын бермей келе жатқан Маңғыстау өртке қарсы қызмет жасағының жұмыс нәтижесі екені анық.

Жасақ бастығы Қайырхан Таласов биылғы жылы өрт қауіпсіздігі бағытында жүргізілген жұмыстармен таныстырды. Оның айтуынша, жылдың тоғыз айы ішінде жалпы саны 133 (2019 жылы 386) нысанның өрт қауіпсіздік жағдайы тексерілген. 

2019 жылы аталған мерзімде 372 болса, биыл 105 бұзушылық анықталған. Соның ішінде үшеуі темір жол жиегінің шөп-шаламнан тазаланбауы, 20-сы өрт сөндіргіштерге, тағы 20-сы автоматты өрт дабылқаққыштың жарамсыздығы немесе жабдықталмағандығы, алты бұзушылық тақтай сөрелерінің асбест қоспасымен қанықтырылмауына қатысты,12-сі тоқ сымдарының ақауына, үшеуі тоқ сымдарының кедергі күшінің тексерілмеуіне, 17-cі өртке қарсы сумен жабдықталмауына, тағы 27 басқа да ұсақ-түйек кем-кетіктерге байланысты болған. 

Тексеріс нәтижесінде 9 нысанға және 2 тоқ жүйесіне қатысты өрт қауіптілігі жайында ескерту парағы берілген. Жолаушылар пойыздарының өрттен қауіпсіздігін сақтау бағытында да сала мамандары бірқатар жұмыстар атқарған. 75/817 жолаушылар пойызы/вагонын тексерген. Одан 110 бұзушылықты анықтаған. Өткен жылы мұндай 432 кемшілік тіркелген екен. Соның ішінде былтыр 5 жолаушылар вагонына қатысты ескерту парағы берілсе, биыл мұндай ескерту 3 жолаушы вагонына жазылған. Локомотивтерден де өрт қауіптілігі жөнінде түрлі олқылықтар кездескен. Тексерілген 1788 локомотивтен 1103 бұзушылық тіркелген. 2019 жылдың тоғыз айында ол көрсеткіш одан да көп, 1915 болған екен. Ал жылжымалы құрамаларда анау айтқан кемшілік табылмаған. 

− Өрт те апат секілді, айтып келмейтін тілсіз жау. Сондықтан қай уақытта болса да өрттің алдын алу үшін сақтықты ұмытпаған абзал. 

Сәл жерден мүлт кетсең кішкентай ғана бір қателік үлкен апатқа соқтыруы мүмкін. Сол үшін де біз осы бағытта теміржолшылармен кездесулерде үнемі ескертеміз. Осыған дейін, мысалы, 7503 жұмыскерге өрт қауіпсіздігі нұсқауын өткіздік. 

2019 жылы бұл аудитория одан әлдеқайда көбірек еді. 13 860 адамды қамтығанбыз. Биыл бізге кедергі келтірген – пандемия. Соның салдарынан ойға алған шаруларымыздың біразы орындалмай қалды. Мәселен, үш тоқсан ішінде 10 оқу-жаттығу өткізу жоспарланған еді. Жоспарлы 8 және жоспардан тыс 1 оқу-жаттығу ұйымдастырдық. Десек те, биылғы жылды шығынсыз, өрт оқиғасынсыз өткізіп отырғанымыздың өзі олжа, – дейді жасақ бастығы Қайырхан Таласов.