Жолаушы - жолсеріктермен кездесулер өтті
Шымкент қаласы бойынша меншікті тілшісі
Жуырда Бадам станциясының теміржолшылары мен ПЧ-53 жол дистанциясы және желілілік полиция басқармасының қызметкерлері бірлесіп, шойын жолдың маңайында тұратын халық пен жолаушы пойыздарының жолаушы- жолсеріктерімен кездесулер өткізді.
Аталған іс-шараның мақсаты – теміржолда орын алатын қауіпті және қайғылы жағдайларды болдырмау және алдын алуды көздейді. Теміржолшылар халықпен кездесу барысында «Абайлаңыз, пойыз!», «Көліктегі қауіпсіздік», «Теміржол – қауіпті аймақ!» тақырыптарын терең тарқатып, жұртшылықты өз өмірі мен денсаулығына мұқият болуға шақырды. Сонымен қатар, теміржолдар мен вокзал маңайында бұзақылық жасайтын жасөспірім жастардың ата-аналарына үлкен көлемде айыппұл салынатынын айтып ескертті.
Осы мақсатта ЖПБ қызметкерлерінің «Құқықтық тәртіп» атты жедел-профилактикалық жұмыстары қатаң жүргізіліп жатқаны да ескертілді. Мектеп оқушыларына теміржол бойында тәртіп сақтау, бұзақылық жасап, ата-анасының қалтасына шығын әкелмеуге, ұялы байланыстың құлаққабын теміржол бойында тақпауға, өміріне абай болуы ескертілді.
Бадам станциясында өткен кездесуде тәртіп бұзған жолаушылар мен азаматтарға ҚР Әкімшілік құқық бұзушылық туралы кодексінің 559-бабының 5-бөлігі, 442-бабының 2-бөлігіне сәйкес әкімшілік жауапкершілікке тартылып, қандай жағдайда айыппұл салынатыны егжей-тегжей түсіндірілді.
Бадам станциясы шағын болса да қауіпсіздік басты орында тұрғандықтан тәртіп барлық жерде бірдей сақталуы тиіс, баршаға ортақ міндет дейді теміржолшылар.