Жіңішке станциясында қауіпсіздік – бос сөз емес
Ақтөбе облысы бойынша меншікті тілші
Мектеп оқушыларының күзгі каникулы алдында теміржолшылар станцияға жақын үйлер мен аулалар, стратегиялық нысанға жақын тұратын тұрғындар арасында рейд жүргізді. Әсіресе жолдың екі жағында да халық тығыз орналасқан Жіңішке станциясында қауіпсіздік – бос сөз емес.
Ақтөбе өңірінде ірі жүк тасымалы қызметін қамтамасыз етіп отырған Жіңішке станциясында пойыздардың қозғалысы өте қарқынды, әсіресе маневрлік қозғалыстар сақтық шараларын ескермейтін жүргінші үшін аса қауіпті. Өндірістік аймақта орналасқан Жіңішке станциясында бір айдың ішінде 3000-ға жуық вагонға жүк тиеліп, 4000-нан аса вагоннан жүк түсіріледі. Жүк тасымалына сүбелі үлес қосып отырған станция жүргіншілер қауіпсіздігін де басты орынға қойған.
Жуырда станциялықтар күзгі каникулға шығып, темір жол бойын ойын алаңына айналдыратын балаларға және теміржол желілеріне іргелес жатқан елді мекен тұрғындары арасында теміржол қауіпті аймақ екенін тағы да еске салып түсіндіру, сақтандыру жұмыстарын жүргізді.
Жол бойында жарақат алу оқиғаларының себептерін талдаған мамандар белгіленбеген жерден өту, пойыздардың жақындауы алдында рельспен жүру, қарама-қарсы бағыттағы пойыздың жоқтығына көз жеткiзбей, бiр бағыттағы пойыз жүре бергеннен кейiн дереу жолдан өту секілді жағдайлар соңы қайғылы жағдаймен аяқталатынына көз жеткізген.
«Жолды қысқартып, уақытты үнемдеймін деген әрекет көбіне ауыр зардаптарға әкеліп соқтырады.
Нәтижесі – өлім немесе мүгедектік. Сондықтан қауіпсіздік – Жіңішке станциясы басшылығының жұмысындағы басым бағыттардың бірі. Бүгінгідей аулалар мен жүргіншілер арасында түсіндіру жұмысын тұрақты өткізіп тұрамыз. Теміржолдан белгіленген жолақтан немесе арнайы көпір арқылы өтуді, локомотивтің алдына шықпауды сұраймыз.
Балалардың каникул кезінде теміржол аймағын ойын алаңына айналдырмауын, ата-аналар жас балаларды қараусыз қалдырмауы тиіс екенін ескерттік», – дейді Жіңішке станциясының басшысы Талғат Сағынов.
Станция кезекшісі барлық пойыздардың келуікетуі және маневрлік қозғалыстар туралы дауыс зорайтқышпен хабарлап отырады. Рұқсат етілмеген жерден өту қаупі туралы тағы қосымша 10 хабарлама ілінген. Өкінішке орай, тұрғындар арасында ондайды жүре тыңдайтын немқұрайлық көп көрінеді.