Атырауда мамандар бірнеше күрделі ақаулы вагондарды анықтады

Пойыздар қозғалысының қауіпсіздігін сақтау – барлық теміржолшыларға ортақ міндет. Жуырда Атырау жүк тасымалы бөлімшесіне қарасты Атырау вагон пайдалану депосында қауіпсіздікке нұқсан келтіретін ақауды дөп кезінде байқаған мамандар анықталды. Алғашқы тоқсан қорытындысы бойынша олар бірнеше күрделі ақаулы вагондарды анықтап, құрамадан ажыратқан. 31 желтоқсан күні Атырау станциясының 9-шы жолында вагон қараушы Б.Қисықов вагонның бүйір рамасының жарылғанын байқаған. Вагонның меншік иесі Ресей, ақаулы вагон құрамнан ағытылып, жөндеуге қойылған. Жалпы, жұмысына адал Б.Қисықов бұған дейін де бірнеше рет ақау тауып, «Қозғалыс қауіпсіздігі үшін» төсбелгісімен марапатталған болатын. Осындай ақауды 3 және 6 қаңтарда Теңдік станциясының вагон қараушылары Е.Қарабаев пен Ж.Тауланбаев та анықтап, болуы мүмкін апаттың алдын алған.

«Жалпы, Атырау, Ақжайық, Теңдік, Мақат, Махамбет станцияларындағы вагон қараушылардың қырағылығы, өз істеріне адалдығын ерекше атап өтуге болады. Жыл басынан бері станцияларда ондаған ақау анықталып, апатқа жол берілмеді» дейді Атырау жүк тасымалы бөлімшесінің қауіпсіздік инженері Ф.Қазжанова.

Сөз жоқ, олардың өз міндеттеріне адалдығы мен жұмысқа сергек қарауы арқасында анықталуы қиын ақаулар табылып, пойыздар қозғалыс қауіпсіздігіне нұқсан келмеді. Сол себепті вагон қараушылар Б.Қисықов, Е.Қарабаев, Ж.Тауланбаевтарды ақшалай сыйақыға, ал А.Оңайбаев, Б.Мұстафаев, С.Сәрсенғалиев, А.Бейбітов, А.Таңатаров, Е.Хатапов, Н.Оңайбаев, К.Қожахметов, Д.Дінқуатов сынды үздік вагоншыларды «Қозғалыс қауіпсіздігі үшін» төсбелгісімен марапаттау жөнінде бөлімше басшылығымен ұсыныс енгізілді. Әрине, күндіз-түні станцияларға ағылып келіп жататын ва- гондардың дұрыс-бұрыстығын тексеріп, ақау тауып, оларды жөндеуге жіберу үлкен жауапкершілікті талап етеді. Сондықтан вагон қараушылар қандай марапатқа да лайық.