Арыс станциясында қауіпсіздік пен еңбек ережесі басты орында

Тоғыз жолдың торабындағы Арыс станциясының теміржолшылары коронавирус індетінің таралу қаупінің алдын алып, карантин шектеулерін қатаң ұстанып еңбек етуде. Әрине, станцияда қауіпсіздік пен еңбек ережесі басты орында. Станцияның бас инженері Мейірбек Мырзахметовтің айтуынша, өткен жылы барлық көрсеткіштер орындалған. Ал жыл басынан бері бес ай бойынша да көрсеткіштер көңілден шығады. Жоспардағы 6 100 вагон айналымы 6 124 вагонға орындалған. Дөңестен сұрыпталып тарқатылған вагондар саны да жоспар бойынша – 2840, орындалғаны – 2923, яғни 102,9 пайызды құраған. Пойыздарды кабылдау – 63, орындалғаны – 64, 101,6 пайыз, пойыздарды жөнелту жоспарда – 63, орындалғаны – 65, 103,2 пайызды құрады. «Арыс – ірі станция. Мұнда жолаушылар мен жүк пойыздары күндіз-түні ағылып жатады, тәуліктің кез келген сағаты мен минуты қайнаған қызу еңбек. Станцияда құрамдарды іріктеп, вагондарды ағытып, сұрыптау үлкен жұмыс пен күшті талап етеді. Бұл – қаншама теміржолшылардың күні-түнгі қажырлы еңбегі», – дейді бас инженер М.Мырзахметов. Арыс станциясын ұзақ жылдардан бері тәжірибелі теміржолшы Бөгенбай Тоқсейітов басқарып келеді. Станция бастығының орынбасары Эдуард Дербисов, Құрманғазы Нарымбетов сынды азаматтар – көп жылдар осы жұмысы аса қауырт станцияның «отымен кіріп, күлімен шығып» жүрген нағыз майталмандар. Бұл үштік күн сайын түнгі ауысымда кезекпен тексеріске шығады. Жұмыс алаңын аралап, қауіпсіздік талаптарының сақталуын көзбен көріп, аяқ асты туындаған түрлі ситуациялық жағдайларды реттеп, таңға дейін жүретін кездері көп. Міне, бүгін де түнгі кезекшілікке шыққан Бөгенбай Тоқсейітов диспетчердің жанында отырып, дөңес кезекшісі, вагон жылдамдығын реттеуші, пойыз құрастырушы, парк кезекшісі, тасымал құжаттарын өңдеуші оператор, пойыз қабылдаушы, т.б. қозғалыс процесіне қатысып жатқандардың жұмысын бақылап отырғанына бір сағаттан асты. Жұмыс қалыпты ырғағымен жалғасып жатыр, пойыздар ақаусыз қабылданып, дөңестен тарқатылуда және қайта өңделіп, станциядан өз бағыттарына жөнелтілуде. 313 теміржолшы еңбек ететін станцияда өз ісінің майталмандары аз емес. Олардың қатарында бірнеше он жылдарын осы станцияға арнаған тәжірибелі теміржолшылар – станция диспетчері Үсен Оразымбетов, станция кезекшілері – Талғат Қалымбетов, Айдархан Құлымбетов, Талғат Садықов, Мұрат Анықбаев, дөңес кезекшілері Еркін Бекмұрзаев, Сәкен Сейсенбаев, дөңес операторлары Д.Алтаев, К.Умирбаев, З.Жартыбаева, пой- ыз құрастырушылар – Төрехан Тоқсейітов, Бауыржан Есенов, Есбол Омарханов, вагон жылдамдығын реттеушілер – Ержан Байырбеков, Марат Бекмұрзаев, Нұрлан Тұрымбетов, пойыз қабылдаушы – Талғат Төреханов, пойыз құрастырушының көмекшілері – С.Базарбаев, Е.Абдихан, тасымалдау құжаттарын өңдеуші операторлар – Гүлнар Құдайқұлова, Ақмарал Бапаева, Нұржамал Лашынбекова, Светлана Рыбалкина, Нұрсұлу Базарбаева секілді мамандар бар.