«ASHYQ» жобасы Ақтөбе теміржол вокзалына енгізіледі
Ақтөбе облысы бойынша меншікті тілші
Ақтөбе теміржол вокзалына «ASHYQ» жобасы енгізіледі. Ғимараттың кіреберістеріне QR-код ілінді. Ереже бойынша «қызыл» және «сары» мәртебесі бар адамдар арнайы санитариялық-эпидемиологиялық бақылау және қадағалау бөліміне жіберіледі. Ол үшін вокзал ішінен арнайы кабинет жабдықталып жатыр. Коронавирус жұқтырған азаматтар мен онымен байланыста болғандар 25 маусымнан бастап Ақтөбе теміржол вокзалына кіре алмайды. Жолаушылар тасымалын ұйымдастырып отырған теміржолшылар да коронавирустың таралу қаупін азайту үшін теміржол вокзалдарында «Ashyq» жобасымен жұмыс жасауға көшті. Енді ғимаратқа QR-код сканерленгеннен кейін ғана кіруге рұқсат етіледі. Ақтөбе вокзалы жолаушылардың шоғырлануын болдырмау үшін үш жерге QR-код қойды. «Вокзал – стратегиялық аймақ. Жолаушылардың қауіпсіздігі сақталуға тиіс. «Ashyq» жобасын қосу үшін санитар мамандармен арнайы кабинет жасақталып жатыр. Ол жерде санитар мамандар мен біздің екі қызметкеріміз отырады. Жолаушылар ғимаратқа кіреберістен тексеріледі. Есік алдындағы күзет қызметі планшеттермен жабдықталған. Теміржол вокзалына «қызыл» және «сары» статусы бар азаматтар кіргізілмейді. Сол себепті Ashyq.kz сайтындағы бейтарап код арқылы өз статусыңызды алдын ала тексеріп алуыңыз қажет», – дейді Ақтөбе теміржол вокзалының басшысы Тойбазар Қуанышев. Кіру кезінде жолаушы QR-кодты ASHYQ.KZ, KASPI.KZ, AITY мобильді қосымшасы арқылы сканерлейді. Егер қосымша орнатылмаған болса, кіребе- рісте вокзал қызметкеріне ЖСН көрсету қажет. Ал шетелдіктердің статусы паспорттың нөмірі арқылы тексеріледі. Бұл ретте 18 жасқа дейінгі балалар тексеруден өтпейді. «Қазіргі уақытта қала тұрғындары мен қонақтарын ақпараттандыру мақсатында роликтер жібердік. Онда пандемия кезіндегі сақтық шаралары мен «Ashyq» жобасының вокзалға енгізілгені және оны пайдалану жолдары түсіндіріледі. Вокзал жаңа жобамен жұмыс жасауға дайын. Изоляция бөлмесіне түскен науқас болса, жолаушылармен байланыс болмас үшін арнайы есік дайындалды. Індет жұқтырған жолаушы анықталған жағдайды бірден оқшаулау мүмкіндігіміз бар», – дейді вокзал бастығы.